51:298  nous  embrassons  la  grace  de  Dieu  par  foy:  il  monstre  que  cela  ne  peut  estre  attribue  sinon  a  ce  que  Dieu  a  pitie  de  nous.  Et  aussi  nous  avons  veu  ci  dessus  aux  Galatiens,  que  S.  Paul  disoit  a  Pierre,  Nous  sommes  Iuifs  de  nature:  d'autant  que  ceste  opinion  estoit  commune,  que  c'estoit  un  lignage  sacre  que  ceux  qui  estoyent  descendus  de  la  race  d'Abraham.  Voire  (dit-il),  quoy  qu'il  en  soit,  nous  n'avons  autre  refuge  ni  asseurance  de  salut,  sinon  de  croire  en  Iesus  Christ,  scachant  que  les  hommes  sont  perdus  et  ruinez  en  eux  mesmes,  d'autant  qu'ils  n'apportent  que  l'ire  et  la  malediction  de  Dieu.  Tout  ainsi  donc  que  S.  Paul  en  ces  passages-la  a  declare  que  les  hommes  s'abusent  s'ils  cuident  avoir  en  eux  quelque  merite  ou  dignite:  aussi  maintenant  pour  mieux  ratifier  ceste  doctrine,  et  pour  oster  toute  dispute  et  abbatre  toute  replique,  il  nous  amene  a  ceste  source:  c'est  a  scavoir,  que  non  seulement  Dieu  donne  la  foy  a  qui  bon  luy  semble,  mais  devant  la  creation  du  monde  il  nous  a  choisis  et  eleus.  Voila  donc  en  somme  ce  que  nous  avons  a  retenir,  c'est  que  depuis  le  plus  grand  iusques  au  plus  petit,  tous  sont  redevables  a  Dieu,  et  n'y  a  si  sainct  ne  si  excellent  qui  se  puisse  exempter  de  ceste  condition  generale  des  hommes.  Or  la  dessus  S.  Paul  magnifie  la  bonte  de  Dieu,  d'autant  que  les  Ephesiens  ont  este  assemblez  et  unis  avec  ceux  qui  auparavant  estoyent  tenus  et  reputez  pour  le  peuple  de  Dieu  et  pour  domestiques  de  son  Eglise.  Devant  que  les  Ephesiens  creussent  a  l'Evangile,  il  y  avoit  grande  diversite,  (comme  encores  il  en  sera  traitte  plus  a  plein  au  second  chap.),  mais  tant  y  a  que  les  Iuifs  fideles,  qui  desia  avoyent  este  convertis  a  nostre  Seigneur  Iesus  Christ,  estoyent  comme  freres  des  Anges  de  Paradis,  en  tant  qu'ils  estoyent  membres  du  chef  commun:  et  les  Ephesiens  estoyent  poures  et  miserables,  alienez  de  tout  espoir  de  salut,  ennemis  de  Dieu,  plongez  en  toute  malediction:  voila  Dieu  qui  oste  une  telle  diversite  et  les  met  tous  d'un  reng.  En  cela  donc  la  bonte  de  Dieu  estoit  plus  patente,  quand  il  a  ainsi  retire  ceux  qui  estoyent  plongez  au  profond  d'enfer,  pour  les  conioindre  avec  ses  enfans  et  pour  les  faire  compagnons  et  heritiers  du  Royaume  des  cieux.  C'est  donc  pourquoy  notamment  S.  Paul,  apres  avoir  parle  de  ceux  qui  auparavant  avoyent  creu  en  Iesus  Christ,  monstre  que  Dieu  a  recueilli  et  establi  son  Eglise  en  telle  sorte,  qu'on  voit  bien  que  les  plus  grans  dependent  du  tout  de  luy  et  ne  peuvent  estre  appuyez  que  sur  sa  pure  misericorde:  et  que  ceux  qui  estoyent  comme  reiettez,  mesmes  detestables,  ont  occasion  de  le  glorifier,  voyant  qu'il  les  a  delivrez  de  la  confusion  en  laquelle  ils  estoyent.  Or  cependant  S.  Paul  monstre  que  ce  qu'il  avoit  dit  auparavant  nous  est  declare  par  les  effects  de  la  grace  de  Dieu.