41:298  ecclesia  peregrinabitur  in  mundo,  et  erit  quasi  dissipata.  Videmus  etiam  hoc  a  tempore  illo  usque  in  praesentem  diem  fuisse  completum.  Hodie  quam  tristis  est  ecclesiae  dissipatio?  Deus  quidem  eam  tuetur  sua  virtute,  sed  praeter  spem  hominum.  Ubi  enim  apparet  nobis  ecclesiae  corpus?  Et  ubi  apparuit  etiam  omnibus  saeculis?  Imo  sunt  frusta  quaedam  lacera  et  dispersa.  Ergo  non  frustra  diceret  angelus,  si  ita  interpretari  libet,  manum  populi  sancti  fore  dispersam,  sed  tamen  finem  fore  beatum,  quemadmodum  paulo  ante  concionatus  est  de  salute  et  de  resurrectione  ultima.  Nunc  sequitur,  8.  Et  ego  audivi,  et  non  intellexi:  et  dixi,  Domine  mi,  quod  postremum  horum?  (hoc  est,  quis  tandem  finis  his  rebus?)  Hic  iam  Daniel  exemplo  angeli  edoctus  interrogat.  Prius  audierat  angelum  unum  sciscitantem  ex  altero:  nunc  quasi  concepta  fiducia,  ipse  etiam,  ut  erat  discendi  cupidus  sese  offert,  et  quaerit,  quisnam  tandem  finis  vel  exitus  ?  Dicit  se  audisse  neque  intellexisse.  Verbo  audiendi  testatur  se  non  fuisse  ignarum  vel  socordia,  vel  contemptu.  Multi  enim,  etiam  si  res  aliqua  optime  explicetur,  tamen  discedunt  sine  ullo  gustu,  nempe  quia  non  fuerunt  attenti.  Sed  hic  propheta  asserit  se  audisse,  hoc  est,  non  stetisse  per  diligentiam,  quominus  intelligeret,  quia  sicuti  dictum  fuit,  cupidus  erat  discendi,  et  praebebat  aures:  tamen  fatetur  se  non  intellexisse.  Hic  non  intelligit  Daniel  prorsus  se  fuisse  stupidum,  sed  haec  ignorantia  restringitur  ad  eius  interrogationem.  Quid  ergo  nescivit  Daniel?  Nempe  quis  esset  finis,  hoc  est,  non  potuit  assequi,  quod  ad  plenam  intelligentiam  et  solidam  necessarium  erat,  quid  sibi  vellent  tot  praedictiones,  quae  tunc  adhuc  erant  obscurae.  Certum  enim  est  Deum  nunquam  verbum  suum  proferre  absque  fructu,  quemadmodum  dicitur  apud  Isaiam  (45,  19),  Non  in  abscondito  loquutus  sum,  neque  frustra  dixi  semini  Iacob,  quaerite  me.  Noluit  igitur  Deus  prophetam  suum  manere  ita  perplexum,  ut  audiendo  non  audiret,  sed  scimus  certos  esse  proficiendi  gradus  in  Dei  schola.  Deinde  scimus  prophetis  fuisse  manifestum  quod  satis  erat  ad  exsequendum  suum  munus:  nemo  tamen  eorum  perfecte  unquam  tenuit  quidquid  poterant  expetere.  Et  scimus  quid  Petrus  dicat,  nempe  illos  tempori  nostro  potius,  quam  suo  ministrasse  (1.  Pet.  1,  12).  Non  erant  quidem  inutiles  suae  aetati:  sed  si  conferatur  nostrum  saeculum  cum  veteri,  certe  hodie  utilior  est  prophetarum  opera  et  doctrina,  et  uberiorem  nobis  fructum  affert,  quam  olim.  Ergo  non  mirum  est,  quod  Daniel  hic  fatetur  se  non  intellexisse,  modo  hoc,  quemadmodum  iam  dixi,  ad  speciem  unam  restringatur.  Sequitur  nunc,