25:298  mandasse:  quibus  verbis  clarius  exprimitur  quod  ob  brevitatem  obscurum  erat.  Quidquid  sit,  Dei  iudicium  fuit  memorabile,  quamvis  homines  adhibuerit  ministros.  Nec  frustra  Paulus  nos  hoc  documento  hortatur  ad  cavendam  scortationem.  Poenae  autem  ratio  fuit  diversa,  quia  promiscuum  vulgus  caesum  fuit,  duces  autem  ipsi  patibulis  affixi,  quo  plus  terroris  incuteret  spectaculum.  Per  capita  enim  populi  eos  intelligit  qui  existimatione  praestabant,  quorum  insignior  debuit  esse  ignominia,  quoniam  in  magnos  et  nobiles  viros  omnium  fere  coniecti  sunt  oculi,  unde  etiam  fit  ut  merito  graviorem  poenam  sustineant,  quia  exemplo  magis  nocent  quam  homines  obscuri,  quorum  facta  non  tam  facile  ad  imitationem  trahuntur.  Viderint  igitur  qui  in  pretio  habentur,  ne  suis  sceleribus  alios  provocent  ad  peccandum:  quia  quo  quisque  magis  excellit,  eo  minus  excusationis  meretur.  Secus  alii  interpretantur,  quasi  iussus  fuerit  Moses  accersere  principes  qui  sententiam  ferrent*  de  sceleratis.  Ita  per  pronomen  Eos  intelligunt  quoslibet  reos  qui  fuerint  convicti.  Sed  vix  probabile  est,  tantam  multitudinem  fuisse  suspensam:  ideoque  non  dubito  quin  de  peculiari  supplicio  agatur.  6.  Et  ecce,  quidam.  Foedum  et  detestabile  prae  aliis  exemplum  hic  commemorat  Moses.  Dubium  non  est  quin  plures  in  tanta  licentia  quae  iam  aliquamdiu  passim  grassata  erat,  variis  flagitiis  tota  castra  repleverint.  Sed  huius  nequitiae  plus  quam  effraenis  fuit  intemperies,  quod  impius  iste  Dei  contemptor,  inter  omnium  gemitus  et  lacrymas  Deo  et  hominibus  proterve  insultavit,  ac  si  de  omni  pudore  et  verecundia  triumphum  ageret.  Flebat  multitudo  ad  tabernaculum,  nempe  pii  omnes  qui  propinquam  cladem  exhorrebant,  quum  certo  persuasi  essent  non  impune  cessuram  libidinem  cum  idololatria  et  sacrilegiis  coniunctam:  hic  perditus  in  medium  prorumpit,  et  eorum  lacrymas  ludibrio  habens,  scortum  quasi  in  pompa  traducit.  Non  mirum  igitur  si  tanta  severitate  usus  fuerit  Deus,  quum  ad  extrema  ventum  esset.  Notandum  vero  est  inversam  esse  historiae  seriem  :  quia  credibile  non  est,  postquam  officio  defungi  coeperant  iudices,  tale  facinus  fuisse  editum.  Sed  haec  narratio  inseritur  ut  melius  pateat  quam  necesse  fuerit  ad  duram  castigationem  mature  progredi:  quoniam  alioqui  non  poterat  malo  desperato  in  tempore  afferri  remedium.  7.  Quod  quum  vidisset  Phinees.  Laudatur  magnanimitas  Phinees,  quod  aliis  cessantibus,  sancto  zelo  ipse  accensus,  ad  poenam  sumendam  prosilierit.  Tacite  ergo  reprehenditur  aliorum  desidia,  quorum  tamen  lacrymae  laudem  merentur:  sed  quoniam  dolore  prope  obtorpuerant,  non  ab  omni  vitio  pura  fuit  eorum  virtus.  Et  certe  quum  effraenis  adhuc  licentia  populi  spumas  instar  maris  tempestuosi  eiiceret,  non  mirum  est  bonorum  animos  fractos