1:298  Quis  regem  sperasset  ex  plebeia  hominis  pecuarii  domo  exiturum?  Et  quum  illic  septem  essent  fratres,  quis  minimo  natu  honorem  destinasset?  Qua  deinde  ratione  ad  spem  regni  pervenit?  Quis  humana  arte  vel  industria,  vel  prudentia  gubernatam  fuisse  unctionem  dicat,  ac  non  potius  vaticinii  coelestis  complementum  esse?  Similiter  quae  de  gentibus  in  foedus  Dei  cooptandis,  obscure  licet,  praedicit,  quum  post  duo  fere  annorum  millia  evenerint,  an  non  divino  afflatu  ipsum  locutum  esse  palam  faciunt?  Omitto  alias  praedictiones,  quae  divinam  revelationem  ita  plane  spirant,  ut  sanis  hominibus  constet  Deum  esse  qui  loquitur.  Breviter,  unum  canticum  (Deut.  32)  illustre  speculum  est,  in  quo  Deus  evidenter  apparet.  29.  In  reliquis  autem  prophetis  multo  etiamnum  clarius  id  cernitur.  Pauca  tantum  exempla  deligam,  quia  in  omnibus  colligendis  nimius  esset  labor.  Quum  Iesaiae  tempore  pacatum  esset  regnum  Iuda,  imo  quum  in  Chaldaeis  aliquid  praesidii  sibi  repositum  putaret,  de  excidio  urbis  populique  exsilio  concionabatur  Iesaias.  Ut  demus  nondum  satis  clarum  specimen  fuisse  divini  instinctus,  multo  ante  praedicere  quae  tunc  videbantur  fabulosa,  tandem  vera  apparuerunt  :  quae  tamen  simul  de  redemptione  vaticinia  edit,  unde,  nisi  a  Deo,  profecta  fuisse  dicemus?  Cyrum  nominat  (Ies.  45,  1),  per  quem  subigendi  erant  Chaldaei,  et  populus  in  libertatem  asserendus.  Elapsi  sunt  anni  plus  centum,  ex  quo  ita  vaticinatus  est  propheta,  priusquam  nasceretur  Cyrus.  Nam  hic  centesimo  demum  anno  aut  circiter  post  illius  mortem  natus  est.  Nemo  divinare  tunc  poterat,  fore  aliquem  Cyrum,  cui  cum  Babyloniis  bellum  futurum  esset;  qui,  tam  potenti  monarchia  sub  manum  suam  redacta,  finem  israelitici  populi  exsilio  imponeret.  Nuda  haec  narratio,  sine  ullo  verborum  ornatu,  nonne  indubia  esse  Dei  oracula,  non  hominis  coniecturas,  quae  Iesaias  loquitur,  plane  demonstrat?  Rursus  quum  Ieremias,  prius  aliquanto  quam  populus  abduceretur,  annis  septuaginta  finiret  tempus  captivitatis,  reditumque  et  libertatem  indiceret  (Ier.  25,  11),  nonne  a  spiritu  Dei  gubernari  eius  linguam  oportuit?  Cuius  impudentiae  erit,  negare  talibus  documentis  sancitam  fuisse  prophetarum  autoritatem;  adeoque  impletum  esse  quod  ipsi  iactant  ad  vindicandam  sermonibus  suis  fidem?  Priora  ecce  venerunt,  nova  annuntio:  antequam  oriantur,  nota  vobis  faciam  (Ies.  42,  9).  Omitto  quod  Ieremias  et  Ezechiel,  quum  tam  procul  essent  dissiti,  tamen  eodem  tempore  prophetantes  in  dictis  omnibus  perinde  consentiebant,  ac  si  mutuo  alter  alteri  dictasset  verba.  Quid  Daniel?  annon  usque  ad  annum  fere  sexcentesimum  de  rebus  futuris  prophetias  ita  contexit,  ac  si  historiam  de  rebus  gestis  et  passim  notis  scriberet?  Haec  si  probe  meditata  habeant  pii  homines,  ad  compescendos  impiorum  hominum  latratus  abunde  instructi  erunt.  Clarior  enim  est  ista  demonstratio,  quam  ut  ullis  cavillis  sit  obnoxia.  30.  Scio  quid  in  angulis  obstrepant  quidam  nebulones,  ut  in  oppugnanda  Dei  veritate  acumen  ingenii  sui  ostentent.  Quaerunt  enim,  quis  nos  certiores  fecerit  a  Mose  et  prophetis  haec  fuisse  scripta,  quae  sub  eorum  nominibus  leguntur  ?  Quin  etiam  quaestionem  movere  audent,  fueritne  unquam  aliquis  Moses?  At  si  quis  in  dubium  revocet,  fueritne  unquam  vel  Plato  aliquis,  vel  Aristoteles,  vel  Cicero,  quis  non  colaphis  aut  flagellis  castigandam  talem  insaniam  dicat?  Fuit  lex  Mosis  coelesti  magis  providentia,  quam  hominum  studio  mirabiliter  conservata.  Et  quanquam  negligentia  sacerdotum  ad  breve  tempus  sepulta  iacuit,  ex  quo  pius  rex  Iosias  eam  invenit,  per  continuas  aetatum  successiones  inter  manus  hominum  versata  est.  Neque  vero  quasi  rem  ignotam  aut  novam  protulit  Iosias;  sed  quae  semper  vulgata  fuerat,  et  cuius  tunc  celebris  erat  memoria.  Dicatum  erat  templo  volumen  prototypon;  dicatum  regiis  archivis,  descriptum  inde  exemplar.  Tantum  hoc  acciderat,  quod  sacerdotes  legem  ipsam  ex  solenni  more  publicare  desierant,  et  populus  etiam  ipse  usitatam  lectionem  neglexerat.  Quid  quod  nullum  fere  saeculum  praeteriit,