25:297  297  REDITUS  AD  HISTORIAM.  298  excitavit  Balaam  dum  miseros  illos  caeca  libidine  inflammatos,  ad  aliud  scelus  impulit,  quo  Deum  sibi  infestum  redderent.  Itaque  Paulus  hanc  historiam  citans  (1.  Cor.  10,  8),  poenam  (cuius  deinde  fiet  mentio)  scortationi  inflictam  fuisse  docet.  Etsi  enim  Deo  propositum  fuit  cultus  sui  violationem  ulcisci,  principium  tamen  mali  et  fontem  inspicere  convenit.  Quemadmodum  si  quis  ebrius  hominem  occiderit,  caedes  ebrietati  imputabitur:  ita  Paulus,  scortatione  impulsos  esse  videns  Israelitas  ad  idololatriam,  proposito  poenae  exemplo  a  scortatione  nos  absterret,  quae  prima  illis  fuit  cladis  causa,  et  eos  pessumdedit.  Porro  quoniam  ab  uno  malo  ad  alia  tam  proclivis  est  lapsus,  eo  attentius  cavere  discamus,  ne  Satan  nos  suis  insidiis  illaqueet.  Notemus  etiam  gradatim  ipsum  obrepere,  quo  nos  circumveniat.  Non  statim  Moabitides  puellae  filios  Israel  sollicitarunt  ad  colenda  idola,  sed  eos  ad  epulas  invitant,  postea  impellunt  hac  ratione  ad  idololatriam.  Nam  si  de  colendis  idolis  initio  verba  fuissent  facta,  exhorruissent  forte  sceleris  atrocitatem,  ad  quam  se  paulatim  deduci  passi  sunt.  Iam  epulo  quod  in  honorem  falsorum  deorum  celebrabatur,  interesse,  obliqua  quaedam  erat  veri  Dei  abnegatio:  ubi  tamen  eousque  pertracti  sunt,  excusso  pudore  sese  proiiciunt  ad  extremum  actum,  ut  veri  et  unius  Dei  honorem  ad  falsos  et  fictitios  transferant.  3.  Et  adiunxit  sese  Israel.  Hac  loquendi  forma  crimen  exaggerat  Moses,  quod  se  impio  foedere  illigaverint  cum  idolo,  ubi  ad  sacram  coniunctionem  qua  Deus  se  populo  devinxerat  alludit,  atque  ita  eos  insimulat  violatae  fidei  et  sceleratae  defectionis.  Et  tamen  probabile  est  non  superstitione  inductum  fuisse  populum,  sed  mulierum  fallaciis  pellectum,  idolis  quae  spernebat  cultum  exhibuisse.  Atqui  audimus  quid  pronunciet  Deus,  astrictos  fuisse  idolo,  quod  per  simulationem  colebant,  ut  morem  gererent  improbis  mulierum  votis.  Hinc  ergo  colligitur  generalis  doctrina,  ubi  a  pura  religione  deflectimus,  quodammodo  nos  pacisci  cum  idolis,  ut  cum  ipsis  in  unum  corpus  coalescamus,  et  conspirare  in  abnegationem  veri  Dei.  Baal  tunc  omnibus  fere  idolis  commune  fuit  nomen.  Epitheton  vero  additur  Moabitarum  idolo  a  monte  Peor.  Neque  enim  videtur  quaerenda  *  esse  longior  etymologia,  quum  nomen  montis  paulo  ante  fuerit  expressum.  Similis  ergo  fuit  ratio  atque  in  papatu,  dum  suas  Marias  a  locis  denominant,  ubi  statuae  magis  famosae  coluntur.  4.  Et  dixit  Iehova  ad  Mosm.  Saepius  ante  visum  est,  Deum  per  se  exercuisse  suas  vindictas,  quasi  exserta  e  coelo  manu:  nunc  has  partes  Mosi  iniungit,  quanquam  ex  contextu  apparet,  non  ipsum  solum  praefici  exsequutioni,  sed  alios  etiam  iudices.  Continuo  enim  post  sequitur,  Mosen  iudicibus  idem