1:297  CAP.  I.  DE  COGNITIONE  DEI  A  13;  B  11;  C  11.]  sibi  ad  se  sustinendam  sufficit.  Haec  autem  virtus  quam  propria  sit  scripturae,  inde  liquet,  quod  ex  humanis  scriptis  quamlibet  artificiose  expolitis,  nullum  omnino  perinde  ad  nos  afficiendos  valet.  Lege  Demosthenem,  aut  Ciceronem;  lege  Platonem,  Aristotelem,  aut  alios  quosvis  ex  illa  cohorte:  miram  in  modum,  fateor,  te  allicient,  oblectabunt,  movebunt,  rapient;  verum  inde  si  ad  sacram  istam  lectionem  te  conferas,  velis  nolis,  ita  vivide  te  afficiet,  ita  cor  tuum  penetrabit,  ita  medullis  insidebit,  ut  prae  istius  sensus  efficacia,  vis  illa  rhetorum  ac  philosophorum  prope  evanescat.  Ut  promptum  sit  perspicere,  divinum  quiddam  spirare  sacras  scripturas,  quae  omnes  humanae  industriae  dotes  ac  gratias  tanto  intervallo  superent.  26.  Tractarunt  alii  hoc  argumentum  copiose.  Quo  fit  ut  pauca  tantum  delibare  in  praesens  sufficiat,  quae  ad  summam  totius  causae  maxime  faciunt.  Praeter  ea  quae  iam  attigi,  non  parum  habet  ponderis  ipsa  scripturae  antiquitas.  Nam  utcunque  graeci  scriptores  de  aegyptiaca  theologia  multa  fabulentur,  nullum  tamen  cuiusquam  religionis  monumentum  exstat,  quod  non  sit  Mosis  saeculo  longe  inferius.  Neque  Moses  novum  Deum  comminiscitur;  sed  quod  de  aeterno  Deo  longa  temporum  serie  a  patribus  quasi  per  manus  traditum  acceperant  Israelitae,  proponit.  Quid  enim  aliud  agit,  quam  ut  ad  foedus  ipsos  revocet  cum  Abrahamo  initum?  Quod  si  rem  inauditam  attulisset,  nullus  erat  accessus;  sed  oportuit  liberationem  a  servitute,  in  qua  detinebantur,  rem  omnibus  notam  ac  tritam  esse,  ut  audita  eius  mentio  protinus  omnium  animos  erigeret.  Quin  etiam  de  quadringentorum  annorum  numero  probabile  est  fuisse  edoctos.  Nunc  reputandum  est,  si  a  tam  alto  exordio  repetit  Moses  doctrinae  suae  traditionem  (qui  tamen  ipse  tanto  intervallo  temporum  alios  omnes  scriptores  superat),  quantum  vetustate  scriptura  sacra  inter  alias  omnes  emineat.  27.  Iam  vero  tot  ac  tam  insignia  quae  refert  miracula,  totidem  sunt  legis  ab  ipso  latae,  proditaeque  doctrinae  sanctiones.  Nam  quod  nube  abreptus  fuit  in  montem,  quod  illic  usque  ad  diem  quadragesimum  humano  contubernio  exemptus  fuit,  quod  in  ipsa  legis  promulgatione  facies  eius  tanquam  solaribus  radiis  fulgebat,  quod  undique  micabant  fulgetra,  tonitrua  et  fragores  toto  aere  exaudiebantur,  tuba  etiam  nullo  humano  ore  inflata  clangebat  ;  quod  tabernaculum  ingressus  nube  opposita  excipiebatur  a  conspectu  populi,  quod  horrendo  Core,  Dathan  et  Abiron,  totiusque  impiae  factionis  exitio  tam  mirifice  vindicata  fuit  eius  autoritas,  quod  lapis  virga  percussus  flumen  protinus  eiecit,  quod  man  e  coelo  ad  eius  precationem  depluit:  nonne  hinc  Deus  ipsum  coelitus  commendabat,  tanquam  indubium  prophetam?  Si  quis  obiiciat,  me  sumere  pro  confessis  quae  controversia  non  careant:  huius  cavilli  facilis  est  solutio.  Nam  quum  haec  omnia  pro  concione  publicaverit  Moses,  quis  fingendi  locus  fuit  apud  ipsos  rerum  gestarum  oculatos  testes?  scilicet  prodiisset  in  medium,  ac  populum  infidelitatis,  contumaciae,  ingratitudinis  aliorumque  scelerum  coarguens,  suam  doctrinam,  sub  ipsorum  conspectu  iactasset  sancitam  fuisse  iis  miraculis,  quae  ipsi  nunquam  vidissent.  28.  Ad  haec,  quod  tribui  Iuda  in  persona  patriarchae  Iacob  assignat  principatum  (Genes.  49,  10),  quis  neget  spiritu  prophetico  factum  esse,  praesertim  si  rem  ipsam,  ut  eventu  comprobata  fuit,  cogitationi  nostrae  subiicimus?  Finge  Mosen  primum  esse  vaticinii  autorem:  ex  quo  tamen  scriptum  hoc  memoriae  prodidit,  praetereunt  anni  quadringenti,  quibus  nulla  est  in  tribu  Iuda  sceptri  mentio.  Post  Saulem  inauguratum  videtur  regia  potestas  in  tribu  Beniamin  residere.  Quum  a  Samuele  ungitur  David,  quaenam  eius  transferendae  ratio  apparet?