5:296  scant:  non  minus  sanguinaria  est  eorum  taciturnitas,  qua  populi  salus  malitiose  proditur,  quam  ipse  hostium  furor,  quo  inermes  et  indefensi  opprimuntur.  Iure  ergo  ex  eorum  manibus  sanguis  reposcitur,  quo  non  minus,  quam  hostium  gladii,  aspersae  foedataeque  sunt.  Quod  aliud  hominum  genus  certius,  quam  se  ipsos,  causabuntur,  illa  Christi  sententia,  qua  pastorem  eum  severissime  obiurgat,  et  mercenarium  contumeliose  appellat,  cui  negat  esse  curae  oves,  qui  dum  venientem  prospicit  lupum,  et  iamiam  instantem,  in  fugam,  relicto  grege,  sese  proripit  (Ioann.  10,  12)?  Quod  si  nunquam  id  a  Domino  pronunciatum  esset,  propriam  illis  conscientiam  iudicem  fero:  pastorem,  qui  vel  minimas  insidias  noctu  senserit,  nisi  expergefactus  mox  accurrat,  nonne  ignaviae  accusabunt?  Eum  vero,  qui  perfossis  stabuli  parietibus,  [pag.  63]  confractoque  ostio,  pauperculum  gregem  omnibus  ventorum,  imbrium,  hostium,  luporum  insidiis  expositum  obnoxiumque  reliquerit,  quantae  socordiae  condemnabunt?  Quid  ille?  cuius  sub  aspectu  media  in  luce  oves  atrociter  laniantur,  ipso  ad  lupos  abigendos  ne  digitum  quidem  commovente?  Quo  satis  digno  elogio  insigniri  poterit  istaec  tam  flagitiosa  perfidia?  qua  supplicii  gravitate  digne  pro  merito  mulctari?  Posthac  si  iustam  et  suae  speculationis,  et  pastoritiae  curae  rationem  reddere  volent,  videant  hoc  in  primis,  sine  quo  nihil  efficiunt  ad  fidem  suam  approbandam,  nihil  sibi  esse  reliqui,  ubi  rei  sanguinis  merito  arguuntur,  a  quo  se  mundos  esse  improbissime  mentiuntur,  nisi  cum  Paulo  vere  ac  serio  affirmare  queant,  se  nequaquam  subterfugisse,  quominus  publice  privatimque  unumquemque  admonendo  omnem  Dei  voluntatem  enarrarent:  praesertim  ubi  circumventam  Satanae  artibus  ecclesiam  gravius  periclitari  senserint.  Quas  in  partes  tanta  solertia  incubuisse  sanctum  illum  apostolum  videmus,  ut  saepius  coram  monuisse  suos  non  contentus,  eadem  quoque  monita  scriptis  absens,  ac  e  vinculis  repeteret:  observarent  canes,  observarent  pravos  operarios,  observarent  concisionem,  quae  impiis  contentionibus  veram  ecclesiae  unitatem  discinderet  (Phil.  3,  2  ss.).  Quid  quod  non  connivendo  tantum,  ac  indulgendo,  miserae  ac  perditae  plebeculae  caecitatem  fovent:  sed  errorum  superstitionumque  omnium  administros  ei  se  praebent?  Etenim  huic  teterrimo  flagitio  quotusquisque  ipsorum  infitiando  erit,  quin  primo  statim  ingressu  pessimo  errore  plebem  imbuat,  dum  ipsa  spectante,  et  ad  stuporem  usque  attenta,  stolidis  exorcismis  aquam  incantat,  mille  postea  infandis  superstitionibus  servituram?  Quin  e  suggestu  rursum  ad  altare  prodeat?  sacrificium  illud  abominandis  blasphemiis  repertum  aut  peragat,  aut  se  peragere  simulet?  ad  exsecrabilis  idoli  venerationem  populum  et  exemplo  suo  et  nutu  invitet?