29:296  quando  debiles  ac  infirmi  fuerimus,  opportunum  auxilium  nobis  allaturum.  Atque  adeo  sciendum  fieri  posse,  ut  totum  vitae  nostrae  curriculum  viles  atque  abiecti  degamus,  ac  velut  humi  reptemus,  verumtamen  Deum  in  hac  deiectione  et  infirmitate  nobis  nunquam  defuturum:  sed  necessarias  vires  suffecturum,  ne  unquam  deficiamus.  Nam  ipse  Deus  promisit,  sese  vires  oppressis  daturum.  Hinc  itaque  nobis  istud  discendum  in  summa  est  :  Dei  potentiam  ac  maiestatem  omnibus  sese  efferentibus  ac  superbientibus  magnopere  metuendam  atque  tremendam,  quae  omnibus  adversus  ipsum  giganteo  more  insurgentibus  ac  bellum  inferentibus  imminet,  atque  ultimum  minitatur  exitium  et  confusionem.  Contra  vero  eandem  illam  potentiam  quae  superbis  omnibus  exitium  adfert,  abiectis  et  humilibus,  sibique  nihil  arrogantibus,  sed  infirmitatem  agnoscentibus,  consolationem  et  solatium  dare,  nempe  quod  ab  unius  Dei  gratia  omnia  pendere  agnoscant.  Quare  quo  Dei  potentiam  magis  cognitam  habent,  eo  confidentius  adversus  quoslibet  superborum  et  insolentium  hominum  insultus  ac  violentiam  audent  subsistere,  non  defuturo  Domini  auxilio  quum  necessitas  postulaverit.  Pergens  Anna  dicit:  Saturos  operam  suam  ob  panem  locavisse,  et  famelicos  expletos  fuisse.  Per  famelicos  intelligite  viros  opulentos,  quibus  vel  ex  amplis  divitiis  vel  magnorum  negotiorum  administratione,  tanti  sunt  reditus  ut  vel  ad  luxum  vivant,  quos  operam  suam  locaturos  ob  panem  dicit,  eos  victum  olim  emendicaturos  innuit:  contra  vero  famelicos  explendos:  Deo  nimirum  ipsis  abunde  victum  suppeditante.  Nova  sane  et  insolens  ista  commutatio  videri  merito  cuivis,  praesertim  Dei  immutabilitatem  intuenti,  posset.  Nam  quum  Deus  sit  immutabilis,  et  eius  etiam  opera  oportere  tenore  semper  eodem  fluere,  ratio  humana  iudicet,  quae  plerumque  sic  ratiocinatur:  Quare  Deus  istiusmodi  confusionibus  et  veluti  fortuitis  casibus  delectatur,  ut  totus  orbis  confusionem  ac  ruinam  minari  videatur,  potentibus  ac  robustis  depressis  atque  debilitatis:  divitibus  et  opulentis  exhaustis  et  depauperatis:  saturis  denique  exinanitis  et  famelicis  effectis?  Immo  vero  primum  si  continua  rerum  serie  ac  vicissitudine  hunc  orbem  regi  conspiceremus,  certe  Dei  providentia  longe  obscurior  esset,  atque  universalis  illa  dispensatio  tantum  stuporem  nostris  sensibus  iniiceret,  ut  omnem  de  Deo  nobis  cogitationem  atque  memoriam  eriperet.  Nam,  exempli  gratia,  si  sol  terrarum  orbem  semper  sine  noctis  vicissitudine  radiis  illustraret,  nunquam  sane  nobis  in  mentem  illa  toties  in  sacris  repetita  doctrina,  Deum  res  omnes  a  se  creatas  gubernare,  veniret.  Sic  quum  ex  sterilitate  damnum  aliquod  patimur,  peccatorum  admonemur:  si  vero  serena  tempestas  fuerit,  divinae  benedictionis  testimonium