25:296  gratiae  Dei  facit,  qui  perversa  impiorum  consilia  discutit  quasi  nebulas,  et  machinationes  evertit:  sicut  alibi  hoc  singulare  beneficium  in  memoriam  revocat  Moses.  Michaeas  etiam  inter  alia  Dei  beneficia  hoc  extollit  (Mich.  6,  5).  Popule  mi  (inquit)  recordare  quale  inierit  consilium  Balac  rex  Moab,  et  quid  responderit  ei  Balaam.  Summa  ergo  est,  turpiter  abiisse  populi  electi  hostes  re  infecta:  quoniam  Deus  eos  dissipavit.  NUMER.  XXV.  1.  Postquam  autem  mansit  Israel  in  Sittim,  coepit  populus  scortari  cum  filiabus  Moab.  2.  Et  vocaverunt  populum  ad  sacrificia  deorum  suorum,  comeditque  populus,  et  adoraverunt  deos  earum.  3.  Et  adiunxit  sese  Israel  ipsi  Baal-peor,  accensusque  est  furor  Iehovae  contra  Israelem.  4.  Et  dixit  Iehova  ad  Mosen:  Assume  omnes  principes  populi,  tunc  suspende  eos  Iehovae,  coram  sole:  et  avertetur  ira  excandescentiae  Iehovae  ab  Israele.  5.  Dixit  ergo  Moses  ad  iudices  Israel:  Occidite  quisque  viros  suos  qui  adiunxerunt  se  ipsi  Baalpeor.  6.  Et  ecce>  quidam  de  filiis  Israel  venit,  et  adduxit  fratribus  suis  Madianitidem  in  oculis  Mosis  atque  in  oculis  totius  congregationis  filiorum  Israel:  ipsi  autem  flebant  ad  ostium  tabernaculi  conventionis.  7.  Quod  quum  vidisset  Phinees  filius  Eleazar  filii  Aharon  sacerdotis,  surrexit  de  medio  congregationis,  et  accepit  lanceam  in  manu  sua.  8.  Ingressusque  est  post  virum  Israel  in  tabernaculum,  et  transfixit  ambos  ipsos,  virum  Israel  et  mulierem  illum  in  ventre  eius:  et  repressa  fuit  plaga  filiis  Israel:  9.  Et  mortui  sunt  plaga  iUa  quatuor  et  viginti  millia.  1.  Postquam  autem  mansit.  Ex  hac  demum  historia  discimus  populum  nihilo  magis  prosperam  fortunam  tulisse  quam  adversam.  Antea  vel  laboris  pertaesi,  vel  inediae  et  famis  impatientes,  saepius  tumultuati  fuerant  contra  Deum:  nunc  ubi  regionem  habitabilem  ingressi  considunt  in  agris  fructuosis,  commoda  habitatione  et  amoeniore  victu  incitantur  ad  lasciviam,  ut  foedis  cupiditatibus  indulgeant.  Narrat  autem  Moses,  postquam  libidini  suae  fraena  laxarunt,  ad  scortandum  simul  et  ad  idololatriam  fuisse  prolapsos.  Videbimus  postea  consilio  Balaam  id  fuisse  factum,  ut  Moabitae  feminas  suas  prostituerent  Israelitis,  quae  ipsos  pellicerent  suis  blanditiis  ad  impios  cultus.  Expertus  erat  Balaam,  Dei  favorem  invictum  esse  propugnaculum  omnibus  noxis  a  populo  arcendis.  Rationem  ergo  invenit  qua  se  ipsos  perdant,  si  non  tantum  se  denudent  protectione  Dei,  sed  iram  eius  in  se  provocent.  Hoc  igitur  flabello  incendium