41:295  295  PRAELECTIONES  296  5.  Et  aaspexi  ego  Daniel,  et  ecce  duo  alii  stantes,  unus  hac  ad  ripam  fluminis,  et  unus  (id  est,  alter)  illac  ad  ripam  fluminis  (hoc  est,  unus  a  parte  una,  et  alter  a  parte  opposita).  6.  Et  dixit  ad  virum  qui  indutus  erat  lineis  (vestibus,  subaudiendum  est)  qui  erat  supra  aquas  fluminis  (hoc  est,  eminebat  in  ipsa  ripa),  Quousque  finis  mirabilium?  7.  Et  audivi  virum  indutum  lineis,  qui  erat  supra  aquas  fluvii,  et  sustulit  dextram  suam,  et  sinistram  suam  versus  coelos,  et  iuravit  per  Viventem  in  aeternum,  quod  ad  tempus  praefixum,  tempora  praefixa,  et  dimidium:  et  ut  consumpserint  (vel  compleverint)  dispersionem  (vel  contritionem)  manus  populi  sancti,  complebuntur  omnia  haec.  Narrat  hic  Daniel  se  vidisse  alios  angelos  stantes  ab  utraque  ripa  fluminis.  Tigrim  vero  designat,  quemadmodum  ante  meminit.  Illic  enim  oblata  fuit  haec  visio.  Dicit  unum  ex  illis  fuisse  ab  altero  rogatum,  quousque  esset  finis:  eum  vero  qui  rogatus  fuerat,  manibus  in  coelum  sublatis,  iurasse  per  Deum  viventem  nihil  frustra  fuisse  praedictum,  quoniam  suo  tempore  veritas  patefiet,  sed  exspectandum  ad  tempus,  tempora,  et  dimidium  temporis.  Haec  summa  est.  Quum  dicit  se  adspexisse,  iterum  certitudinem  visionis  commendat.  Nisi  enim  fuisset  attentus,  et  serio  applicuisset  animum  ad  haec  mysteria,  minus  haberet  fidei  eius  narratio.  Sed  quum  animo  composito  fuerit,  deinde  quum  studuerit  intelligere  quod  Deus  per  angelum  suum  docebat,  non  potest  vocari  in  dubium  quod  tam  fideliter  nobis  tradit.  Nomen  virorum  attribuit  angelis,  secundum  eam  rationem  quae  prius  fuit  exposita.  Neque  enim  significat  vere  fuisse  homines,  sed  nomen  illis  imponit  ab  externa  specie.  Quoniam  ergo  gestabant  faciem  humanam,  ideo  viros  appellat.  Neque  tamen  dico  imaginarium  illis  fuisse  corpus,  aut  quum  Daniel  videret  homines,  fuisse  duntaxat  spectra  aut  larvas,  sed  fieri  potuit  ut  Deus  induerit  angelos  suos  ad  tempus  corporibus,  neque  tamen  ideo  essent  homines.  Nam  Christus  sic  carnem  nostram  accepit,  ut  vere  fuerit  homo,  et  Deus  manifestatus  in  carne.  Aliter  autem  de  angelis  dicendum  est,  quibus  datum  fuit  temporale  corpus,  donec  suis  mandatis  essent  defuncti.  Hoc  quidem  dubitatione  caret,  improprie  virorum  nomen  attribui  angelis,  sed  apte  propter  similitudinem,  vel  formam  hominum  quam  gestabant.  Quod  autem  alter  ex  angelis  alterum  interrogat,  non  mirum  est.  Scimus  quum  Paulus  extollit  mysterium  vocationis  gentium,  quod  fuerat  absconditum  a  saeculis,  hoc  etiam  adiungi  (Ephes.  3,  10),  angelis  esse  admirabile:  quia  scilicet  prius  nihil  tale  speraverint,  quia  patefactum  illis  non  erat.  Sic  igitur  mirabiliter  operatur  Deus  in  ecclesia  sua,  ut  angelos  ipsos  coelestes  in  admirationem  rapiat.  Et