7:294  quas  novit  quum  huic  saeculo  necessarias,  tum  vero  utiles  in  longum  tempus  posteris  fore.  Facturum  ergo  se  negavit  ut  his  tricis  impediri  se,  aut  remoram  sibi  iniici  ad  retardandum  cursum  suum  sineret.  Ego  porro,  cui  probe  noti  sunt  omnes  Caroli  sensus,  scio  nihil  aliud  eum  venari,  quam  ut  videatur  Calvinum  ad  certamen  impulisse:  ardet  enim  ieiuna  quadam  ambitione.  Et  quum  iam  ultra  vicesimum  quintum  annum  hunc  lapidem  frustra  volvat,  ut  famam  sibi  nonnullam  acquirat  apud  homines,  putat  hoc  optimum  esse  compendium,  [pag.  5]  si  Calvinus  eum  alicubi  nominaverit;  nec  vero  magnopere  curat,  si  interim  insigni  ignominia  notetur.  Hoc  enim  unum  illi  satis  est,  si  mundo  innotuerit,  fuisse  aliquem  Carolum  qui  Calvinum  et  similes  exercuerit,  et  ultro  eos  impetere  non  dubitaverit.  Obsequar  itaque  eius  cupiditati  aliqua  ex  parte,  sed  ita  ut  testatum  omnibus  relinquatur,  tales  viros  ne  uno  quidem  verbo  eiusmodi  bestiam  dignatos  esse;  et  certe  haec  gravitas  eos  decet,  ut  cum  Socrate  dicant:  Si  asinus  nos  calce  feriret,  numquid  ei  diem  diceremus?  Adde  quod  minime  opus  est  magno  aliquo  et  eximio  patrono,  ad  hanc  causam  agendam.  Refellendae  enim  sunt  improbissimi  hominis  futiles  calumniae,  et  refellendae  non  subtilibus  argumentis  et  ex  intimo  artificio  depromptis,  sed  simplici  nudaque  rei,  de  qua  agitur,  narratione.  Ipsa  autem  narratio  confirmanda,  non  rationibus  magna  cura  et  arte  excussis,  sed  actis  publicis,  Caroli  ipsius  testimonio,  quod  eius  manu  consignatum  exstat,  et  aliis  probationibus  non  minus  planis  quam  solidis.  Ergo  neque  acumen  singulare,  nec  recondita  doctrina,  nec  exquisita  eloquentia,  neque  anxium  studium  hic  requiritur,  sed  sola  fides  in  proferenda  veritate,  et  mediocris  in  digerendo  rerum  contextu  prudentia.  Ex  adverso,  si  respicimus  quis  sit  Carolus,  quicunque  vel  tenuem  christianae  doctrinae  gustum  habet,  eum  valde  infelicis  ingenii  esse  oportet,  nisi  par  sit  [pag.  6]  ad  illum  sustinendum.  Nec  me  latet  quantum  sibi  placeat.  Verum  sibi  intus  canat  et  plaudat  ut  volet;  omnes  19*