47:294  aboleatur,  quin  redigatur  in  nihilum  caro  et  quidquid  Dei  iustitiae  adversum  est.  Denique  necessum  est,  ut  mundi  novitatem  mortificatio  praecedat.  Quare  pronuntiat  Christus,  eiiciendum  esse  mundi  principem:  quia  hinc  dissipatio  et  deformitas  quod,  dum  tyrannidem  usurpat  Satan,  grassetur  iniquitas.  Eiecto  itaque  Satana  mundus  a  defectione  revocatur  sub  Dei  imperium.  Si  quis  roget,  quomodo  deiectus  in  morte  Christi  fuerit  Satan,  qui  assidue  bellare  non  desinit,  respondeo  eiectionem  hanc  non  restringi  ad  exiguum  aliquod  tempus,  sed  describi  insignem  illum  mortis  Christi  effectum,  qui  quotidie  apparet.  32.  Si  exaltatus  fuero.  Sequitur  modus  statuendi  iudicii  :  quod  scilicet  Christus  in  crucem  sublatus  omnes  ad  se  colliget,  ut  e  terra  in  coelum  ipsos  attollat.  Dicit  evangelista  Christum  speciem  mortis  suae  indicasse.  Non  dubium  ergo  est  quia  sensus  sit,  crucem  instar  vehiculi  fore,  quo  secum  ad  patrem  omnes  attollat.  Videri  tunc  poterat  evectus  e  terra,  ne  quid  amplius  illi  cum  hominibus  commune  foret:  sed  longe  aliter  cessurum  pronuntiat,  ut  scilicet  trahat  sursum  ad  se,  qui  in  terra  defixi  erant.  Quanquam  autem  alludit  ad  formam  mortis,  generaliter  tamen  intelligit,  mortem  suam  non  fore  dissidium,  quo  separetur  ab  hominibus:  sed  novam  terrae  in  coelum  attrahendae  rationem.  Quod  omnes  dicit,  referendum  est  ad  Dei  filios  qui  ex  grege  sunt.  Assentior  tamen  Chrysostomo,  qui  particula  universali  usum  esse  Christum  tradit,  quia  ex  gentibus  pariter  et  Iudaeis  colligenda  esset  ecclesia,  secundum  illud:  Erit  pastor  unus,  et  unum  ovile  (supra  10,  16).  Vetus  interpretatio  latina  habet:  Omnia  traham  ad  me:  et  Augustinus  ita  legendum  contendit,  sed  consensus  graecorum  omnium  codicum  pluris  apud  nos  valere  debet.  34.  Respondit  ei  turba:  Nos  audivimus  ex  lege,  quod  Christus  in  aeternum  manet:  et  quomodo  tu  dicis,  Oportet  exaltari  filium  hominis?  Quis  est  iste  filius  hominis?  35.  Dixit  ergo  illis  Iesus:  Adhuc  ad  breve  tempus  lumen  vobiscum  est  :  ambulate  donec  lumen  habetis,  ne  tenebrae  vos  comprehendant:  et  qui  ambulat  in  tenebris,  non  novit,  quo  vadat.  36.  Donec  lumen  habetis  j  credite  in  lumen,  ut  filii  luminis  sitis.  Haec  loquutus  est  Iesus,  et  abiens  absconditus  est  ab  illis.  34.  Nos  audivimus  ex  lege.  Non  dubium  est  quin  maligne  verba  Christi  cavillari  propositum  illis  fuerit,  ideo  sua  eos  malitia  excaecat,  ut  in  clara  luce  nihil  cernant.  Negant  Iesum  sibi  habendum  pro  Christo,  quia  se  moriturum  dixerit,  quum  lex  Messiae  perpetuitatem  tribuit.  Quasi  vero  non  habeatur  utrumque  diserte  in  lege  expressum,  quod  ubi  mortuus  fuerit  Christus,  florebit  eius  regnum  usque  in  finem  mundi.  Isti  vero  ex  secundo  membro  calumniae  ansam  arripiunt.  Principium  autem  erroris  19*