41:294  deficeret,  vel  ne  putaret  minoris  pretii  esse  hoc  vaticinium,  quia  non  excipietur  plausu  totius  mundi.  Claude  ergo  librum.  Et  quid  est  claudere?  non  ut  omnibus  sit  absconditus,  sed  ut  propheta  satis  habeat,  ubi  viderit  paucos  tamen  esse  qui  reverenter  amplectantur  doctrinam,  quae  fuerat  illi  per  angelum  patefacta.  Non  est  autem  hoc  proprie  mandatum,  hoc  est,  non  simpliciter  angelus  praecipit  Danieli,  ut  abscondat  vel  obsignet  hunc  librum  et  hos  sermones,  sed  hoc  subiicitur  solatii  loco,  quasi  diceret,  Si  omnes  conspuant  in  hanc  doctrinam,  vel  ubi  proposueris  eam  reiiciant,  si  maior  pars  illam  contemptim  praetereat,  claude,  inquit,  ac  obsigna,  hoc  est,  ne  vilescat  tibi  propterea,  sed  maneat  apud  te  instar  thesauri.  Ego  enim  eam  depono  apud  te,  et  inter  discipulos  meos  conserva.  Tu  igitur  Daniel.  Ideo  exprimitur  nomen  prophetae,  quasi  diceret,  Etiam  si  putas  te  nunc  esse  solum,  tamen  erunt  qui  postea  accedent  tibi  socii,  et  subscribent  vera  pietate  huic  vaticinio,  Claude  ergo,  et  obsigna  usque  ad  tempus  finis,  hoc  est,  tandem  Deus  comprobabit  ipso  eventu  se  non  frustra  loquutum  esse,  et  experientia  patebit  me  fuisse  ab  ipso  missum,  ut  tibi  haec  ante  tempus  praedicerem.  Iam  sequitur,  Investigabunt  multi,  et  augebitur  scientia.  Quidam  contrario  sensu  accipiunt  hoc  secundum  membrum,  quod  scilicet  multi  erratici  spiritus  per  vagas  speculationes  discurrent  atque  errabunt.  Sed  illud  est  nimis  coactum.  Ego  itaque  non  dubito  quin  hic  promittat  angelus  venturum  esse  tempus,  quo  Deus  multos  sibi  discipulos  colliget,  quamvis  initio  paucissimi  erunt  ac  fere  nulli.  Multi  ergo  investigabunt,  hoc  est,  etiamsi  nunc  ut  plurimum  ignavi  sint  ac  socordes,  qui  iactant  se  esse  ex  populo  Dei,  tamen  Deus  colliget  sibi  hinc  inde  magnam  copiam.  Est  quidem  nunc  exiguus  numerus,  imo  nulli  fere  apparent  fideles,  quibus  curae  sit  Dei  veritas,  vel  qui  studium  suum  ad  eam  discendam  applicent,  sed  ne  te  moveat  haec  paucitas.  Tandem  enim  fiet,  ut  augescant  filii  Dei.  Multi  ergo  investigabunt,  et  scientia  augebitur,  hoc  est,  non  semper  in  obscuro  latebit  haec  prophetia.  Dominus  enim  tandem  efficiet,  ut  multi  eam  amplexentur,  et  quidem  in  salutem,  quod  etiam  videmus  fuisse  factum.  Ante  adventum  Christi  non  obtinuit  pretium  suum  et  gratiam  haec  doctrina.  Scimus  enim  quanta  tunc  fuerit  inscitia  et  ruditas,  ut  denique  fere  subversa  fuerit  religio,  tamen  postea  Deus  ecclesiam  suam  auxit.  Et  hodie  quanta  ad  nos  redeat  utilitas  ex  hoc  vaticinio  quisque  apud  se  expendat:  nullis  certe  verbis  potest  satis  exprimi,  quia  nisi  servata  nobis  fuisset  haec  prophetia,  et  quasi  recondita  instar  inaestimabilis  thesauri,  multum  fidei  nostrae  decederet.  Habemus  autem  adiumentum  ad  nos  confirmandos,  quod  superare  potest  omnes  diaboli,  et  mundi,  et  inferni  insultus.  19*