1:294  istorum  omnium  regulam  ecclesia  praescriberet?  Pendet  igitur,  inquiunt,  ab  ecclesiae  determinatione  et  quae  scripturae  reverentia  debeatur,  et  qui  libri  in  eius  catalogo  censendi  sint.  Ita  sacrilegi  homines,  dum  sub  ecclesiae  praetextu  volunt  effraenatam  tyrannidem  invehere,  nihili  curant  quibus  se  et  alios  absurditatibus  illaqueent,  modo  hoc  unum  extorqueant  apud  simplices,  ecclesiam  nihil  non  posse.  Atqui  si  ita  est,  quid  miseris  conscientiis  fiet  solidam  vitae  aeternae  securitatem  quaerentibus,  si  quaecunque  exstant  de  ea  promissiones  solo  hominum  iudicio  fultae  consistant?  An  accepto  tali  responso  fluctuari  et  trepidare  desinent?  Rursum,  quibus  impiorum  sannis  subiicitur  fides  nostra?  quantam  apud  omnes  in  suspicionem  vocatur,  si  credatur,  hominum  beneficio,  non  secus  ac  precariam  habere  autoritatem?  22.  Sed  eiusmodi  nugatores,  vel  uno  apostoli  verbo  pulchre  refelluntur.  Ecclesiam  ille  testatur  (Eph.  2,  20),  prophetarum  et  apostolorum  fundamento  sustineri.  Si  fundamentum  est  ecclesiae  prophetica  et  apostolica  doctrina,  suam  huic  certitudinem  ante  constare  oportet,  quam  illa  exstare  incipiat.  Neque  est  quod  cavillentur,  etiam  si  inde  primum  exordium  ducat  ecclesia,  manere  tamen  dubium,  quae  prophetis  et  apostolis  sint  adscribenda,  nisi  iudicium  ipsius  intercedat.  Nam  si  christiana  ecclesia  prophetarum  scriptis  et  apostolorum  praedicatione  initio  fundata  fuit,  ubicunque  reperiatur  ea  doctrina,  ecclesiam  certe  praecessit  eius  approbatio,  sine  qua  nunquam  ecclesia  ipsa  exstitisset.  Vanissimum  est  igitur  commentum,  scripturae  iudicandae  potestatem  esse  penes  ecclesiam;  ut  ab  huius  nutu  illius  certitudo  pendere  intelligatur.  Quare  dum  illam  recipit  ac  suffragio  suo  obsignat,  non  ex  dubia  aut  alioqui  nutabunda  authenticam  reddit;  sed  quia  veritatem  esse  agnoscit  Domini  sui,  pro  pietatis  officio,  nihil  cunctando  veneratur.  Quod  autem  rogant,  unde  persuadebimur  a  Deo  fluxisse,  nisi  ad  ecclesiae  decretum  confugiamus?  perinde  est,  ac  si  quis  roget,  unde  discemus  lucem  discernere  a  tenebris,  album  a  nigro,  suave  ab  amaro?  Non  enim  obscuriorem  veritatis  suae  sensum  ultro  scriptura  prae  se  fert,  quam  coloris  sui  res  albae  ac  nigrae;  saporis,  suaves  et  amarae.  23.  Scio  equidem  vulgo  citari  Augustini  sententiam,  ubi  se  evangelio  crediturum  negat,  nisi  ecclesiae  ipsum  moveret  autoritas.  1)  Sed  quam  perperam  et  calumniose  citetur  in  eum  sensum  ex  contextu  facile  est  deprehendere.  Negotium  illi  erat  cum  Manichaeis,  qui  absque  controversia  credi  sibi  volebant,  quum  veritatem  se  habere  pollicerentur,  non  ostenderent.  Quia  vero  ut  Manichaeo  suo  fidem  astruerent,  obtendebant  evangelium,  rogat  quidnam  facturi  sint,  si  in  hominem  incidant  qui  ne  evangelio  quidem  credat?  quo  genere  persuasionis  eum  sint  in  suam  sententiam  adducturi?  Postea  1)  Locus  est  contra  epist.  fundamenti  c.  5.  19*