41:293  293  IN  DANIELEM.  CAP.  XII.  294  alacritatem.  Quanto  enim  honore  nos  dignatur  coelestis  pater,  quum  vult  nos  esse  ministros  suae  iustitiae?  Sicuti  etiam  dicit  Iacobus,  nos  servare  qui  perituri  erant,  si  eos  in  viam  reducamus.  Vocat  nos  Iacobus  (5,  19  sq.)  servatores,  sicuti  etiam  angelus  vocat  nos  iustificatores,  non  quod  interea  quidquam  vel  Iacobus,  vel  angelus  delibet  ex  Dei  gloria,  sed  his  loquendi  formis  significat  spiritus  nos  esse  ministros  et  iustitiae  et  salutis,  quum  adducimus  nobiscum  in  salutem  eos,  qui  opus  habebant  nostro  labore  adiuvari.  Tandem  sequitur,  4.  Et  tu  Daniel,  claude  (vel  obsera)  verba  (sermones)  et  obsigna  librum  ad  tempus  finis  (hoc  est,  ad  tempus  praefixum,  quod  Deus  finivit  suo  consilio,  ut  ante  docuimus),  discurrent  multi  (vel  indagabunt:  Schuth  significat  quidem  discurrere,  sed  non  accipitur  in  malam  partem  pro  vagari:  imo  saepe  etiam  significat  investigare:  multi  ergo  investigabunt),  et  augebitur  scientia.  Hunc  locum  exponunt  interpretes  ac  si  diceret  angelus  multos  fore  indignos,  quos  admittat  Daniel  ad  hoc  vaticinium,  ideo  claudendum  esse  inter  paucos,  vel  saltem  aenigmatice  esse  tradendum,  ut  vix  centesimus  quisque  assequatur  quod  dictum  fuerit.  Ego  autem  existimo  aliud  fuisse  consilium  spiritus  sancti,  nempe  quasi  dixisset  angelus,  Non  est  quod  despondeas  animum,  aut  vilescat  apud  te  haec  prophetia,  quoniam  pauci  eam  excipient,  imo  passim  spernetur  et  ludibrio  habebitur,  claude  nihilominus  eam  instar  pretiosi  thesauri.  Idem  fere  valet  locus  ille  Isaiae  8  (v.  16),  Claude  legem  meam,  obsigna  testimonium  inter  discipulos  meos.  Isaias  enim  poterat  frangi  animo  quum  videret  se  esse  despectui  apud  omnes,  et  quasi  pedibus  calcari  sacra  Dei  oracula.  Poterat  ergo  abiicere  animum,  et  ita  se  abdicare  officio  doctoris.  Deus  autem  solatium  adhibet,  Claude,  inquit,  inter  discipulos  meos  legem  meam,  hoc  est,  ne  moreris  profanum  hoc  vulgus.  Quamvis  ergo  omnes  tuam  doctrinam  spernant,  non  est  quod  propterea  existimes  vocem  tuam  esse  ludicram:  claude,  claude  inter  discipulos,  inquit,  hoc  est,  quamvis  pauci  sint  qui  hanc  doctrinam  amplectantur,  sit  tamen  reposita  in  piorum  cordibus,  et  sancta  maneat.  Postea  sequitur  apud  prophetam,  Ecce  pueri  mei  mecum.  Illic  gloriatur  propheta  se  contentum  esse  paucissimis,  et  ita  insultat  multitudini  impiae  quae  insolescebat,  quemadmodum  hodie  videmus  fieri  in  papatu:  et  in  toto  orbe  ita  grassatur  impietas  ut  nullus  fere  sit  angulus,  ubi  maior  pars  consentiat  in  verum  Dei  obsequium.  Ergo  quoniam  futurum  videbat  Deus,  ut  paucissimi  amplecterentur  qua  decebat  reverentia  hoc  vaticinium,  ideo  per  angelum  voluit  animare  prophetam,  ne