1:293  CAP.  L  DE  COGNITIONE  DEI.  A10;  B  9;  C  9.]  efficacem  provideret:  hac  recta  via  contendendum  nobis  est,  si  ad  sinceram  Dei  contemplationem  serio  aspiramus.  Ad  verbum,  inquam,  est  veniendum,  ubi  probe,  et  ad  vivum,  nobis  a  suis  operibus  describitur  Deus:  dum  opera  ipsa  non  ex  iudicii  nostri  pravitate,  sed  aeternae  veritatis  regula  aestimantur.  Ab  eo  si  deflectimus,  quamlibet  strenua  enitamur  celeritate,  quia  tamen  extra  viam  cursus  erit,  nunquam  ad  metam  pertingemus.  Sic  enim  cogitandum  est:  fulgorem  divini  vultus,  quem  et  apostolus  inaccessum  vocat  (1  Tim.  6,  16),  esse  nobis  instar  inexplicabilis  labyrinthi,  nisi  verbi  linea  in  ipsum  dirigamur.  Ut  satius  sit  in  hac  via  claudicare,  quam  extra  eam  celerrime  currere.  Proinde  David,  ubi  commemoravit  gloriam  Dei  a  coelis  enarrari  (Psal.  19,1  ss.),  opera  manuum  enuntiari  a  firmamento,  ab  ordinata  dierum  noctiumque  serie  maiestatem  eius  praedicari,  deinde  ad  verbi  mentionem  descendit:  lex,  inquit,  Domini  immaculata,  convertens  animas;  testimonium  Domini  fidele,  sapientiam  praestans  parvulis;  iustitiae  Domini  rectae,  laetificantes  corda;  praeceptum  Domini  lucidum,  illuminans  oculos;  significans  illam,  universalem  esse  omnium  institutionem;  hanc  vero,  peculiarem  filiorum  Dei  scholam.  Hinc  et  illud  emanavit  quod  Samaritanae  mulieri  dicebat  Christus  (Ioan.  4,  22);  gentem  eius  et  reliquos  omnes  populos  adorare  quod  nescirent;  solos  Iudaeos  Deo  vero  cultum  exhibere.  Nam  quum  humana  mens,  pro  sua  imbecillitate,  pervenire  ad  Deum  nullo  modo  queat,  nisi  sancto  eius  verbo  adiuta  et  sublevata,  omnes  tunc  mortales,  exceptis  Iudaeis,  quia  Deum  sine  verbo  quaerebant,  necesse  fuit  in  vanitate  atque  errore  versari.  21.  Ubi  sermonem  Dei  esse,  qui  proponitur,  in  confesso  est,  nemo  est  tam  deploratae  audaciae,  nisi  forte  et  sensu  communi  et  humanitate  quoque  ipsa  destitutus,  qui  fidem  loquenti  derogare  ausit.  Sed  quoniam  non  quotidiana  e  coelis  redduntur  oracula,  et  scripturae  solae  exstant,  quibus  visum  est  Domino  suam  perpetuae  memoriae  veritatem  consecrare,  obiter  attingendum  est,  quo  iure  eandem  apud  fideles  autoritatem  obtineant,  ac  si  vivae  ipsae  Dei  voces  exaudirentur.  Res  sane  dignissima  quae  et  tractetur  fusius  et  accuratius  expendatur.  Sed  dabunt  veniam  lectores,  si  magis  respiciam  quid  ferat  operis  instituti  ratio,  quam  huius  rei  amplitudo  requirat.  Invaluit  autem  apud  plerosque  perniciosissimus  error,  scripturae  tantum  inesse  momenti,  quantum  illi  ecclesiae  suffragiis  conceditur:  ac  si  vero  aeterna  inviolabilisque  Dei  veritas  hominum  arbitrio  niteretur.  Sic  enim  magno  cum  ludibrio  spiritus  sancti  quaerunt:  ecquis  nobis  fidem  faciat,  haec  a  Deo  prodiisse?  ecquis  salva  et  intacta  ad  nostram  usque  aetatem  pervenisse  certiores  reddat?  ecquis  persuadeat,  librum  hunc  reverenter  excipiendum,  alterum  numero  expungendum,  nisi  certam