55:292  ad  vanitatem  propensione.  Porro  quia  firmas  et  perpetuas  habere  radices  nulla  doctrina  potest  in  hominum  cordibus,  si  qua  dubitatione  sit  implicita,  certam  Dei  veritatem  esse  testatur,  in  qua  edocti  sunt.  Et  certe  nisi  animis  nostris  constet  haec  certitudo,  necesse  erit  subinde  vacillare,  et  flexibiles  esse  ad  quemvis  novae  doctrinae  ventum.  Per  Dei  gratiam,  fidem  cum  suis  effectis  et  fructibus  intelligit.  13.  Quae  in  Babylone.  Multi  ex  veteribus  Romam  aenigmatice  putarunt  notari.  Hoc  commentum  Papistae  libenter  arripiunt,  ut  videatur  Petrus  romanae  ecclesiae  praefuisse.  Neque  enim  deterret  eos  nominis  infamia,  modo  sedis  apostolicae  titulum  praetexere  ipsis  liceat:  nec  Christum  magnopere  curant,  modo  Petrus  ipsis  relinquatur.  Quin  etiam  modo  retineant  cathedrae  Petri  nomen,  suam  Romam  in  profundis  inferis  collocare  non  recusabunt.  Atqui  vetus  illud  commentum  nihil  habet  coloris:  nec  video  cur  Eusebio  et  aliis  placuerit,  nisi  quia  illo  errore  iam  occupati  erant,  Petrum  Romae  fuisse.  Adde  quod  secum  ipsi  pugnant.  Marcum  octavo  Neronis  anno  Alexandriae  mortuum  esse  tradunt  :  Petrum  vero  sex  annis  postea  fingunt  Romae  a  Nerone  suisse  occisum.  Si  alexandrinam  ecclesiam  Marcus  (ut  volunt)  constituit,  diuque  illic  episcopatu  functus  est,  nunquam  potuit  Romae  esse  cum  Petro.  Nam  quod  Eusebius  et  Hieronymus  romanam  Petri  sessionem  in  vigintiquinque  annos  extendunt,  id  facile  refellitur  ex  primo  et  secundo  ad  Galat.  cap.  Quum  itaque  Marcum  tunc  secum  Petrus  comitem  habuerit,  quum  scripsit  hanc  epistolam:  Babylone  fuisse  probabilius  est.  Atque  id  quoque  eius  vocationi  fuit  consentaneum.  Scimus  enim  peculiariter  datum  fuisse  apostolum  Iudaeis:  quare  eas  pracipue  regiones  lustrabat,  in  quibus  maior  erat  gentis  suae  frequentia.  Quod  ecclesiam  illic  esse  dicit  eiusdem  electionis  participem,  huc  spectat,  ut  inde  alii  magis  ac  magis  in  fide  se  confirment.  Erat  enim  hoc  magnum,  Iudaeos  ex  tam  remotis  mundi  plagis  in  unam  ecclesiam  colligi.  Filius  meus.  Sic  Marcum  appellat  honoris  causa:  ratio  tamen  est,  quod  eum  in  fide  genuerat,  sicut  Timotheum  Paulus.  De  osculo  alibi  dictum  est.  Vult  autem  hoc  osculum  esse  caritatis,  ut  animi  sinceritas  externae  caeremoniae  respondeat.