47:292  immensi  eius  amoris  erga  nos  specimen.  Caeterum  memoria  tenendum  est  quod  prius  admonui,  humanos  affectus,  a  quibus  Christus  immunis  non  fuit,  puros  in  eo  fuisse  et  a  peccato  immunes:  ratio  est,  quia  compositi  erant  et  temperati  ad  Dei  obsequium.  Neque  enim  obstat  auin  mortem  naturaliter  horreat  Christus,  et  tamen  cupiat  parere  Deo:  nempe  secundum  diversos  respectus.  Hinc  illa  correctio,  quum  dicit  propterea  veni  in  hanc  horam.  Utcunque  enim  mortem  per  se  timere  liceat,  quia  tamen  reputat  quorsum  missus  sit  et  quid  exigat  redemptoris  officium,  conceptum  ex  naturae  sensu  horrorem  patri  domandum  offert,  vel  potius  eo  domito  liber  et  solutus  ad  exsequenduin  Dei  imperium  se  accingit.  Quod  si  Christi  affectus  omni  vitio  puros  ita  subigi  oportuit,  ut  patri  obsequens  esset,  quanto  studio  in  hoc  incumbere  nos  oportet,  quando  totidem  ei  sunt  inimici  in  nobis,  quod  ex  carne  nostra  affectus  scaturiunt?  Sit  haec  igitur  piorum  meditatio,  vim  sibi  facere,  donec  se  ipsos  abnegaverint.  Simul  notandum  est,  non  tantum  affectus  eos  esse  fraenandos,  qui  ex  diametro  pugnant  cum  Dei  voluntate,  sed  qui  vocationis  nostrae  cursum  impediunt,  etiamsi  alias  pravi  non  sint  nec  vitiosi.  Hoc  ut  clarius  pateat,  in  primo  gradu  locanda  est  Dei  voluntas.  In  secundo  voluntas  hominis  sincera  et  integra,  qualem  Deus  Adae  indiderat  et  qualis  in  Christo  fuit.  In  postremo  nostra,  quae  peccati  contagione  infecta  est.  Voluntas  Dei  regula  est,  cui  subiici  oportet  quidquid  est  inferius.  Iam  pura  naturae  voluntas  Deo  per  se  rebellis  non  erit:  homini  tamen,  etiamsi  totus  ad  rectitudinem  formatus  sit,  multa  impedimenta  occurrent,  nisi  suos  affectus  Deo  subigat.  Christo  igitur  unum  et  simplex  certamen  fuit,  ut  quod  naturaliter  tenebat  timere  desineret,  quum  agnoscit  aliter  Deo  placere.  Nobis  autem  duplex  est:  quia  cum  carnis  nostrae  contumacia  luctandum  est.  Hinc  fit  ut  fortissimi  quique  athletae  nunquam  tamen  absque  vulnere  superent.  Pater,  serva  me.  Hic  ordo  nobis  servandus  est,  quoties  vel  motu  angimur  vel  urimur  dolore,  ut  statim  corda  nostra  se  ad  Deum  efferant.  Nihil  enim  deterius  est  vel  magis  noxium  quam  intus  alere  quod  nos  cruciat  :  sicuti  videmus  bonam  mundi  partem  se  arrodere  caecis  tormentis  atque  in  omnibus,  qui  ad  Deum  non  assurgunt,  haec  iusta  est  socordiae  poena,  ne  quidquam  levationis  sentiant.  28.  Pater,  glorifiica  nomen  tuum.  His  verbis  patris  gloriam  se  aliis  omnibus  praeferre  testatur,  etiam  posthabita  et  neglecta  vitae  rjatione.  Atque  haec  vera  demum  est  votorum  omnium  moderatio,  si  Dei  gloriam  ita  expetimus,  ut  reliqua  omnia  locum  ei  cedant.  Haec  enim  compensatio  abunde  nobis  sufficere  debet,  ut  quaecunque  gravia  et  molesta  sunt  aequo  animo  feramus.