41:292  digne  nobiscum  agi,  quamvis  Deus  non  ita  delicate  nos  tractet,  quoniam  sufficere  nobis  debet  coelestis  gloria,  et  eius  vitae,  quae  nobis  promissa  est,  perpetuitas.  Dicit  autem  doctores,  vel  qui  intellectu  erunt  praediti,  fore  fulgidos  quasi  lucem  coelorum.  Si  doctores  notari  placeat,  erit  synecdoche,  ideoque  generalem  expositionem  sequar.  Vocat  intellectu  praeditos  qui  non  discedent  a  recta  et  pura  Dei  cognitione,  quemadmodum  fusius  postea  dicetur.  Nam  ponet  angelus  antithesin  inter  vesanos,  qui  contempto  Deo  insaniunt  in  sua  superbia,  et  inter  fideles,  quorum  tota  sapientia  est,  Deo  se  subiicere,  et  ipsum  colere  puro  animi  affectu.  Illic  ergo  plura  dicenda  erunt  die  crastino.  Sed  nunc  dicit  eos  qui  sinceram  pietatem  retinuerint,  fore  similes  luci  expansionis,  hoc  est,  fore  haeredes  regni  coelorum,  ubi  potientur  gloria,  cui  nihil  est  par  in  toto  fulgore  mundi.  Neque  enim  dubium  est  quin  hic  angelus  quod  incomprehensibile  est  figuris  designet,  quasi  diceret,  non  posse  quidquam  reperiri  in  mundo,  quod  gloriae  electi  populi  respondeat.  Et  qui  iustificaverint  multos,  quasi  stellae,  inquit.  Hic  aliis  verbis  idem  repetit.  Nam  ponit  tunc  stellas,  quum  antea  dixerit  fulgorem  expansionis,  sed  eodem  sensu  :  pro  intellectu  praeditis  dicit  eos  qui  iustificaverint.  Non  dubium  est  quin  doctores  praecipue  hic  notet  angelus:  tamen  meo  iudicio,  complectitur  omnes  pios  Dei  cultores.  Neque  enim  quisque  ex  filiis  Dei  sibi  privatim  est  addictus,  sed  debet  quantum  in  se  est  consulere  etiam  fratrum  suorum  saluti.  Hac  enim  lege  deposuit  apud  nos  Deus  salutis  doctrinam,  non  ut  eam  quisque  supprimat,  sed  ut  studeat  viam  salutis  aliis  omnibus  monstrare.  Hoc  igitur  communiter  extenditur  ad  omnes  Dei  filios,  nempe  quod  debent  studere  fratrum  saluti.  Hoc  per  iustificandi  verbum  intelligit  angelus,  non  quod  sit  in  hominum  arbitrio  quemquam  iustificare,  sed  quod  proprium  Dei  est  transfertur  ad  eius  ministros.  Interea  certum  est  nos  iustificari  doctrina,  quae  affert  nobis  fidem,  sicuti  etiam  fide  iustificamur,  quae  a  doctrina  pendet.  Cur  fidei  iustitia  nostra  adscribitur?  Nempe  quia  fides  nos  ad  Christum  dirigit,  in  quo  est  tota  perfectio  iustitiae.  Nunc  si  fides  iustificat,  eadem  etiam  ratione  doctrina.  Qui  autem  doctrinam  hanc  nobis  afferunt,  etiam  ministri  sunt  nostrae  iustificationis.  Perinde  igitur  est  ac  si  diceret  angelus  filios  Dei,  qui  et  se  totos  addicent  Deo  et  spiritu  prudentiae  regentur,  deinde  qui  etiam  monstrabunt  aliis  viam,  eos  non  tantum  salvos  fore,  sed  etiam  potituros  inaestimabili  gloria,  cui  nihil  simile  potest  ostendi  in  mundo.  Haec  summa  est.  Hinc  vero  colligimus  quaenam  sit  vera  prudentia,  nempe  ubi  simplici  docilitate  submittimus  nos  Deo,  sed  necesse  est  etiam  alterum  accedere,  ut  sedulo  curemus  salutem  fratrum  nostrorum.  Et  effectus  ipse  laboris  nostri  debet  animos  addere  et