29:292  rientur.  Anna  igitur  Deum  vocans  scientiarum  Deum,  ostendit  mortales  vehementer  falli  quum  sibi  indulgent  eousque  ut  scientiae  opinione  turgidi  magna  quaedam  moliantur,  quae  tamen  momento  Deus  dissipat  et  donat  ventis  irrita.  Ex  hoc  loco  itaque  discamus,  primum  si  animi  nostri  vires  exiguae  fuerint,  ad  Deum  supplices  accedere,  ut  illas  augeat  et  roboret:  deinde  si  viribus  polleamus,  eundem  precari  ne  nos  ingratitudine  et  arrogantia  nostra  tanto  bono  privari  permittat.  Denique  ipsius  verbo  nos  ipsos  et  iudicium  nostrum  ac  rationem,  et  in  summa  quidquid  virtutis  accepimus  semper  subiiciamus  :  nostroque  sic  officio  fungamur  ne  arroganter  insolescamus  eiusque  dona  floccifaciamus,  quasi  nostris  viribus  aut  consiliis  quaecunque  suscipimus  perfecturi:  ne  quid  insolenter  nobis  arrogemus,  sed  cum  omni  modestia  et  moderatione  vitae  curriculum  ex  Dei  mandatorum  praescripto  decurramus,  ne  sensui  nostro  et  libidini  locum  demus,  ad  ea  quae  fas  non  est  suscipienda.  Pergens  Anna  dicit:  Ipsi  praeparari  cogitationes  qui  locus  est  subobscurior,  ac  proinde  etiam  varie  explicatur.  Nam  vox  hebraea  proprie  numerare,  vel  ponderare  significat,  aliquando  etiam  vox  eadem  sola  litera  immutata  bonum  valde  indicat:  hinc  fi't  ut  quidam  hunc  sensum  eliciant:  Dei  opera  omnia  bene  esse  composita  ac  ordinata.  Qui  sensus  bonam  quidem  doctrinam  continet,  quod  nempe  Deus  quid  bonum  sit  quidque  utile  probe  notum  habeat,  nihilque  illum  lateat,  ac  proinde  talem  esse  rerum  quas  ordinaverit  stabilitatem  ut  eas  nullus  immutare  possit.  Verum  si  genuina  vocis  significatio  retineatur,  sensus  videtur  elici  commodior:  Dei  nempe  opera  neque  digeri  neque  ponderari  posse.  Quem  si  sensum,  qui  mihi  commodissimus  videtur,  retineamus,  non  parva  ad  nos  ex  ipso  redibit  utilitas.  Nam  Deo  hoc  vel  illud  decernente  sciemus  neminem  esse  qui  id  vel  remoretur  vel  impediat,  testibus  apostolo  Paulo  et  Esaia  propheta,  quum  aiunt:  Opera  tua,  Domine,  sunt  admiranda  et  incomprehensa,  quis  sese  illis  oppositurus  est?  En  quomodo  gloriari  fideles  adversus  quascunque  molitiones  et  consilia  poterunt,  quibus  hodie  Satan  totum  orbem  infestat.  Atque  haec  esto  doctrina  ex  verborum  illorum  sensu,  Dei  opera  digeri  aut  ponderari  non  posse.  Pulchre  igitur  haec  Annae  verba  inter  se  conveniunt  seque  invicem  explicant,  quum  Deum  notitiarum  dicit,  et  eius  opera  cognosci  vel  ponderari  non  posse.  Non  posse  videlicet  mentem  humanam  divinorum  operum  immensitatem  assequi,  et  sigillatim  illa  cognoscere  ac  describere:  sed  satis  esse  si  gustum  aliquem  illorum  habeat,  quo  in  admirationem  eorundem  rapiatur.  Hoc  ait  Propheta  Psalm.  40.  vers.  6:  Admirabilia  Dei  quis  potest  digerere?  Optime  sane  haec  Annae  verba  cum  Davidis,  etsi  multis  post