1:292  [A9;  B  8;C8.  19.  Ergo,  ut  Deus,  ad  spoliandam  omni  patrocinio  hominum  impietatem,  numinis  sui  fulgorem  in  creaturis  delineatum  sine  exceptione  universis  proponit:  ita  quibus  se  destinavit  in  salutem  manifestare,  eorum  imbecillitati  efficaciore  remedio  succurrit.  Nam  in  eorum  eruditionem  non  mutis  duntaxat  magistris  utitur,  sed  os  quoque  sacrosanctum  reserat;  neque  tantum  promulgat,  colendum  aliquem  esse  Deum,  sed  eum  se  esse  simul  pronuntiat,  qui  colendus  sit.  Nec  ipsos  docet  modo  in  Deum  respicere,  sed  se  quoque  exhibet  in  quem  respiciant.  Hunc  enim  ordinem  ab  initio  Dominus  in  servorum  suorum  vocatione  tenuit,  ut  praeter  omnia  illa  documenta  verbum  quoque  adhiberet,  quae  multo  rectior  et  familiarior  est  ad  ipsum  dignoscendum  nota.  Sic  Adam  sic  Noe,  sic  Abraham  et  reliqui  patres  in  cognitionem  eius  interiorem  verbo  illuminati  penetrarunt;  sive  illis  instillabatur  per  oracula  et  visiones,  sive  prioribus  ita  revelatum,  eorum  ministerio,  quasi  per  manum  illis  1)  tradebatur.  Neque  tamen  intererat,  quo  tandem  modo  fierent  eius  verbi  participes,  modo  a  Deo  profectum  esse  intelligerent;  cuius  rei  Deus  indubiam  semper  fidem  fecit,  quoties  eius  revelationi  voluit  esse  locum.  Ergo  peculiariter  se  paucis,  evidenti  praesentiae  suae  dato  signo,  insinuavit,  ac  salvificae  doctrinae  thesaurum  apud  eos  deposuit,  cuius  ipsi  rursum  ad  posteritatem  dispensatores  forent.  Qualiter  Abraham  videmus  foedus  aeternae  vitae,  apud  se  coelesti  oraculo  depositum,  et  propagasse  in  totam  familiam,  et  in  longam  generationem  transmittendum  curavisse.  Atque  hoc  quidem  interstitio,  iam  tum  a  reliquis  nationibus  distinguebatur  Abrahae  progenies,  quod  singulari  Dei  beneficio  in  istam  verbi  communionem  admissa  erat.  20.  Porro  ubi  ecclesiam  aliquanto  adhuc  selectiorem  erigere  Domino  visum  est,  illud  ipsum  verbum  et  solenniore  ritu  promulgatum  et  tabulis  consignatum  voluit.  Tunc  ergo  scriptis  commendari  coeperunt  Dei  oracula,  quae  antea  de  manu  in  manum  tradita  in  populo  Dei  asservabantur.  Qua  in  re  singulari  providentia  Deus  posterorum  saluti  consuluit.  Nam  si  reputamus  quam  lubricus  sit  humanae  mentis  lapsus  in  Dei  oblivionem,  quanta  in  omne  genus  erroris  proclivitas,  quanta  ad  confingendas  identidem  novas  et  factitias  religiones  libido:  perspicere  licebit  quam  necessaria  fuerit  talis  coelestis  doctrinae  consignatio,  ne  vel  oblivione  deperiret,  vel  errore  evanesceret,  vel  audacia  hominum  corrumperetur.  Quum  itaque  palam  sit,  Deum,  erga  eos  omnes,  quos  unquam  erudire  cum  fructu  voluit,  subsidium  verbi  adhibuisse,  quod  effigiem  suam  in  mundi  compositione  impressam  parum  esse  1)  posteris  1543  et  seqq.  contra  mentem  autoris.