5:291  EPISTOLA  II.  est,  rursum  vendis,  rursum  crucifigis.  Quid  est  enim  aliud,  ecclesiam  (quam  suo  sanguine  Christus  acquisivit)  modo  improbam  lucri  cupiditatem  expleas,  dissipandam  prostituere,  quam  ipsum  Christi  sanguinem,  quo  aestimata  est  pretio  addicere?  Quid  est  autem  Christum  crucifigere,  nisi  hoc  est?  sanguini  eius  contemptim  illudere,  ac  tantum  non  ipsum  ludibrio  habere?  Et  hanc  scilicet  tam  insignem  contumeliam  semper  feret  ille,  quem  pater  gloria  et  honore  coronavit?  Tu  vero,  si  sapies,  nunc  sacrosanctum  Christi  sanguinem,  quanti  meretur,  potius  aestimabis:  quam  exspectabis,  dum  supplicii  atrocitate  discas,  quanti  a  Domino  ipso  fiat.  Proinde  videndum  nunc  tibi  quoque  est,  quo  iure  ad  te  redeat  proventus  ille  amplissimus,  quem  episcopi  dum  esse  iactas,  tuum  facis.  Equidem  video  sic  esse  a  Domino  constitutum,  ut  qui  evangelium  administrant,  iis  vicissim,  quidquid  est  ad  usus  vitae  necessarium,  administretur.  Nec  illi  placere,  ut  os  obligetur  bovi  trituranti.  Sed  quis  tibi  concedat,  ut  fructum,  quo  evangelii  ministerium  Dominus  muneratur,  ipse,  nihil  minus  quam  evangelii  minister,  legas,  et  quae  bovi  trituranti  adiudicat  alimenta,  otiosus  vores?  Presbyteros,  qui  bene  praesunt,  nobis  commendat  apostolus  (1  Tim.  5,  17),  ut  duplici  in  honore  habeantur,  praesertim  qui  in  verbo  laborant.  Eum  ergo  qui  sibi  honorem  poscit  episcopi,  bene  regendo  prius  efficere  aequum  est,  ut  honore  dignus  iure  censeatur.  Quod  si  etiam  ita  te  geras,  ut  ad  optimi  pastoris  fidem,  studium,  diligentiam,  integritatem  nihil  desiderari  possit:  quorsum  tamen  immodica  illa,  nullisque  [pag.  58  j  finibus  terminata  opulentia  ?  Vitaene  pastoris  sustinendae,  cuius  ipsam  moderationis  esse  vult  Dominus,  limitata,  ac  non  tyrannicae  potius  luxuriae  par  est?  Sed  eam  nondum  reprehendo,  quae  suo  postea  loco  perstringetur.  Hanc  in  praesentia  duntaxat  improbitatem  accuso:  quod  uberrimos  inde  fructus  referas,  sementem  ubi  penitus  nullam  feceris.  Haec,  inquam,  impudentissima  est  rapacitas:  et,  quod  audire  ordinis  tui  homines  minime  sustinent,  furtum  bis  manifestum:  cum  qui  manum  operi  nunquam  admoverit,  operae  tamen  mercedem  imperiose  flagitare.  Si  fustuario  dignus  est,  qui  vicini  parietem  perfodisse  sit  deprehensus,  quo  in  eius  arcam  involaret:  flagitiosum  hoc  tuum  latrocinium,  quae  furcae  satis  pro  dignitate  mulctabunt,  qui  hinc,  quod  officii  laboribus  debetur  stipendium,  suffuraris,  inde  omnium  domos  rapacissime  depraedaris?  Sic  quidem  longa  annorum  praescriptione  obtinuit  illa  furandi  licentia,  ut  honestis  etiam  titulis  ornetur.  Verum  utcunque  inter  homines  aestimetur,  non  eorum  errore  tamen  rescindetur,  quae  semel  adversus  eam  pronunciata  est  a  Domino  sententia:  Vae  pastoribus,  inquit  (Iez.  34,  lss.),  qui  pascunt  semetipsos.  Nonne  greges  a  pastoribus  pasci  moris  est?  Vos  autem  lac