1:291  INSTITUTIO  REL.  CHRIST.  1539  .  1554.  sed  quae  ante  praefocantur  quam  pleniorem  effundant  fulgorem.  Quamobrem  apostolus,  eo  ipso  loco  (Hebr.  11,  3),  ubi  saecula  simulacra  vocat  rerum  invisibilium,  subiungit  per  fidem  intelligi  esse  verbo  Dei  aptata;  ita  significans,  invisibilem  divinitatem  repraesentari  quidem  talibus  spectaculis,  sed  ad  illam  perspiciendam  non  esse  nobis  oculos,  nisi  interiore  Dei  revelatione  per  fidem  illuminentur.  Neque  Paulus,  ubi  tradit  patefieri  quod  cognoscendum  est  de  Deo  ex  mundi  creatione  (Rom.  1,  19),  talem  manifestationem  designat,  quae  hominum  perspicacia  comprehendatur;  quin  potius  eam  ostendit  non  ultra  procedere,  nisi  ut  reddantur  inexcusabiles.  Idem  quoque,  tametsi  alicubi  (Act.  17,  27)  negat  Deum  procul  vestigandum,  utpote  qui  intra  nos  habitet;  alio  tamen  loco  docet  quorsum  valeat  eiusmodi  propinquitas.  In  praeteritis,  inquit  (Act.  14,  16),  generationibus  permisit  Dominus  gentes  ingredi  viis  suis,  non  tamen  se  ipsum  sine  testimonio  reliquit,  benefaciens  e  coelo,  dans  pluvias  et  tempora  fructifera,  implens  cibo  et  laetitia  corda  hominum.  Utcunque  ergo  non  destituatur  testimonio  Dominus,  dum  plurima  et  varia  benignitate  homines  in  sui  cognitionem  suaviter  allicit,  vias  tamen  suas,  hoc  est  exitiales  errores,  propterea  sequi  non  desinunt.  18.  Quanquam  autem  naturali  facultate  deficimur,  quominus  ad  puram  usque  et  liquidam  Dei  cognitionem  conscendere  liceat,  quia  tamen  hebetudinis  vitium  intra  nos  est,  praecisa  est  omnis  tergiversatio.  Neque  enim  ignorantiam  sic  praetexere  licet,  quin  semper  et  ignaviae  et  ingratitudinis  convincamur.  Digna  scilicet  quae  admittatur  defensio,  si  homo  ad  audiendam  veritatem  aures  sibi  defuisse  obtendat,  ad  quam  enarrandam  suppetunt  mutis  creaturis  plusquam  canorae  voces;  si  oculis  se  non  posse  videre  causetur,  quod  sine  oculis  creaturae  demonstrant;  si  mentis  imbecillitatem  excuset,  ubi  omnes  sine  ratione  creaturae  erudiunt.  Quare  omni  prorsus  excusatione  merito  excludimur,  quod  vagi  et  palantes  aberramus,  quum  omnia  rectam  viam  demonstrent.  Sed  enim,  utcunque  hominum  vitio  imputandum  sit,  quod  semen  notitiae  Dei,  ex  mirabili  naturae  artificio  mentibus  suis  inspersum,  mox  corrumpunt,  ne  ad  frugem  bonam  ac  sinceram  perveniat:  verissimum  tamen  est,  nuda  ista  et  simplici  testificatione,  quae  Dei  magnificentiae  a  creaturis  redditur,  nequaquam  nos  sufficienter  erudiri.  Simul  enim  ac  modicum  divinitatis  gustum  ex  mundi  speculatione  delibavimus,  vero  Deo  praetermisso,  eius  loco  somnia  et  spectra  cerebri  nostri  erigimus,  iustitiae,  sapientiae,  bonitatis,  potentiae  laudem  ad  ipsa  derivando.  Quotidiana  porro  eius  facta  ita  aut  obscuramus  aut  invertimus  prave  aestimando,  ut  et  suam  illis  gloriam,  et  autori  debitam  laudem  praeripiamus.