29:290  cumbendum,  ut  de  Deo  loquentes,  simul  etiam  ipsum  sanctificemus,  nihil  de  ipso  temere,  ut  de  re  mortali,  cogitantes:  sed  ipsius  numen  venerantes  ac  timentes  discamus  ab  eo  uno  omne  in  nos  imperium  ac  dominationem  avzoxQaxoqix^v  obtinente  sic  pendere,  ut  in  uno  ipso  spem  omnem  nostram  collocemus,  ad  unicum  ipsum  confugiamus,  ut  boni  omnis  fontem  et  originem,  certo  persuasi  nos  in  ipso  quidquid  nobis  opus  fuerit  inventuros.  Hac  ratione  Deum  sanctificare  nos  decet:  et  praeterea  huc  omnia  vota  nostra  dirigenda  ut  nomen  eius  semper  sanctificetur,  scientes  quum  ex  Christi  mandato  petimus  in  oratione  dominica  nomen  Dei  sanctificari,  publicam  esse  protestationem,  in  nos  ipsos  redundaturam,  si  nomen  Dei  verbis  sanctificari  postulantes,  factis  deinde  nostris  idem  profanamus  atque  polluimus.  Caeterum  quum  ait  nullum  esse  sanctum  ut  est  Dominus,  ex  admiratione  divinae  maiestatis  facit.  Quod  exemplum  nobis  hic  imitandum  proponitur,  ut  quum  infinitam  Dei  potentiam,  iustitiam  ac  rectitudinem  meditati  fuerimus,  in  nobis  ipsis  commoveamur,  atque  haec  animo  nostro  versemus:  Quid,  Domine,  faciamus,  quum  ne  millesimam  quidem  tuarum  virtutum  partem  mente  assequamur,  quomodo  digne  eas  celebremus?  Extra  nos  igitur  ipsos  exeundum  nobis  est,  ut  supra  terrarum  orbem  totum  efferamur,  quum  de  Deo  nobis  mentio  aliqua  facienda,  aut  etiam  quando  cum  ipso  est  communicandum.  Qua  in  re  Davidem  exemplar  habemus  imitandum,  quum  ait,  Domine  quam  tua  opera  sunt  admiranda,  ut  efferri  ac  narrarri  non  possint,  nihilominus  eorundem  narrationem  instituit.  Atqui  duo  illa  inter  se  contraria  esse  videbuntur,  nisi  Davidem  intelligamus  pro  sua  mensura  et  captu  narraturum  quidem  quaecunque  de  divinis  operibus  poterit,  sed  ea  tamen  nihil  esse  ad  eorum  excellentiam  et  magnitudinem.  Nam  humana  mens  crassior  est  ac  rudior  quam  ut  divinorum  operum  maiestatem  assequatur.  Atque  hic  est  verborum  Annae  sensus,  nullum  esse  sanctum  nisi  Dominum.  Deinde  nullum  in  hominibus  esse  robur  ostendit  nisi  a  Domino  promanarit,  quum  ad  superiora  istud  addit:  Non  esse  fortem  sicut  Deum  nostrum.  Atque  huc  nobia  confugiendum  a  Deo  gratiam  et  favorem  exspectantibus  :  hoc,  inquam,  Dei  robur  ac  fortitudo  cunctis  tentationibus  opponenda  sunt.  Haec  sunt  maximae  quibus  nos  Satan  adoritur  tentationes,  ut  dum  rerum  humanarum  adspectum  terribilem  et  horrendum  nobis  obiicit,  sic  percellat  ut  animum  prorsus  abiiciamus.  Si  forte  hostium  in  nos  multitudo  insurrexerit,  robur  ac  potentiam  ipsorum,  numerum,  munitiones,  apparatum  bellicum,  propugnacula,  currus  armatos,  et  similia  multa  Satan  nostris  oculis  subiicit.  Quibus  sane  terriculamentis,  ad  primum  illorum  adspectum  deiiceremur,  si  in  19