40:29  29  IN  EZECHIELIS  PROPH.  CAP.  I.  30  verba  servis  suis,  sed  etiam  operatur  arcano  spiritus  sui  instinctu,  nec  patitur  vanum  esse  illorum  laborem.  Posset  igitur  locus  hoc  modo  accipi.  Sed  quoniam  propheta  hic  duntaxat  sibi  sumit  quod  erat  necessarium,  et  ita  vendicat  sibi  locum  et  gradum  prophetae:  ideo  quum  loquitur  de  manu  non  dubito  quin  notetur  intrinseca,  ut  ita  loquar,  operatio.  Est  quidem  haec  quoque  spiritus  sancti  interior  efficacia,  ubi  virtutem  suam  profert  in  auditoribus,  ut  fide  amplectantur  sermonem:  verum  etiam  si  omnes  auditores  sint  surdi,  et  in  fumum  abeat  Dei  sermo,  intrinseca  tamen  Dei  virtus-  est  in  ipsis  prophetiis:  hoc  designat  Ezechiel  sibi  a  Deo  fuisse  datum.  Hic  ego  finiam,  quia  cogerer  statim  abrumpere,  et  veniendum  erit  ad  visionem,  quae  est  omnium  difficillima.  Iam  excutienda  est  nobis  visio,  cuius  obscuritas  ita  deterruit  Iudaeos,  ut  vetuerint  eius  explicationem  aggredi,  vel  tentare.  Atqui  vel  frustra  Deus  apparuit  prophetae  suo,  vel  cum  aliquo  fructu  :  illud  dicere  esset  nimis  absurdum.  Quod  si  utilis  est  nobis  visio,  necesse  est  eam  intelligi  saltem  aliqua  ex  parte.  Si  quis  excipiat,  fuisse  oblatam  prophetae  non  autem  reliquis:  cavillum  illud  facile  diluitur,  quia  scripsit  propheta  quod  hic  legimus  in  communem  usum  totius  ecclesiae.  Iam  si  quis  interroget  an  visio  sit  dilucida,  fateor  esse  valde  obscuram,  neque  profiteor  me  ipsam  intelligere:  sed  tamen  quod  Deus  nobis  proposuit  non  modo  inquirere  licet,  atque  utile  est,  sed  etiam  necessarium.  Esset  igitur  turpis  socordia,  claudere  sponte  oculos,  et  non  attendere  ad  hanc  visionem.  Caeterum  modo  gustemus  in  summa  quid  Deus  voluerit,  hoc  iam  erit  non  levis  momenti  :  et  sufficiat  nobis  non  solum  mediocris  aliqua  intelligentia,  sed  etiam  tenuis.  Hoc  breviter  volui  praefari:  nunc  venio  ad  ipsa  prophetae  verba.  4.  Et  vidi,  et  ecce  ventus  turbinis  (vel  procellosus)  veniens  ab  aquilone:  nubes  magna,  et  ignis  involutus  (vel  contortus),  et  splendor  ei  undique:  et  e  medio  eius  tanquam  facies  Hasmal  e  medio  ignis.  Primo  videndum  est  quorsum  spectet  haec  visio.  Mihi  vero  dubium  non  est,  quin  Deus  voluerit  servum  suum  instruere  autoritate:  deinde  voluerit  terrorem  iniicere  populo.  Quum  ergo  hic  describitur  nobis  formidabilis  Dei  forma,  primo  hoc  referri  debet  ad  doctrinae  reverentiam.  Negotium  enim  erat  prophetae  cum  duris  et  praefractis  hominibus,  quemadmodum  satis  notum  est,  ac  melius  videbimus  in  progressu.  Oportuit  igitur  subigi  illam  arrogantiam:  alioqui  propheta  surdis  verba  fecisset.  Sed  Deus  respexit  in  alium  finem.  Est  igitur  tenenda  analogia,  vel  similitudo  inter  hanc  visionem,