23:29  29  COMMENTARIUS  IN  GENESIN.  30  Quaeritur  tamen  annon  scortatores  etiam  et  adulteri  Dei  virtute  generent:  quod  si  verum  est,  ad  eos  similiter  extenditur  Dei  benedictio.  Respondeo,  hanc  divini  instituti  corruptelam  esse:  quod  autem  ex  hac  quoque  lacuna  non  minus  quam  ex  puro  coniugii  fonte  sobolem  Deus  educit,  hoc  illis  cedet  in  maius  exitium.  Illa  tamen  pura  et  legitima  gignendi  ratio  fixa  manet  quam  Deus  initio  instituit:  illa  est  lex  naturae  quam  inviolabilem  esse  dictat  communis  sensus.  Subiicite  eam.  Confirmat  quod  prius  de  principatu  dixit.  Iam  hac  lege  creatus  erat  homo  ut  sibi  terram  subiiceret:  verum  nunc  demum  iuris  sui  compos  efficitur,  quum  audit  quid  sibi  datum  sit  a  Domino,  idque  plenius  adhuc  exprimit  Moses  proximo  versu,  quum  Deum  inducit  herbas  et  fructus  donantem.  Magni  enim  refert  nihil  nos  ex  Dei  bonis  attingere  quod  non  sciamus  nobis  ab  eo  permissum:  neque  enim  aliter  bona  conscientia  ulla  re  fruimur  nisi  quum  eam  suscipimus  quasi  ex  Dei  manu.  Atque  ideo  docet  Paulus  (Rom.  14,  23)  edendo  et  bibendo  nos  semper  peccare,  nisi  adsit  fides.  Ita  a  solo  Deo  petere  docemur  quidquid  nobis  necesse  est:  usu  autem  ipso  donorum  in  meditanda  eius  bonitate  paternaque  cura  exercemur.  Huc  enim  spectant  Dei  verba:  Ecce  tibi  paratum  a  me  victum  antequam  factus  esses  :  me  igitur  patrem  agnosce,  qui  tibi  nondum  creato  tam  diligenter  prospexerim.  Quin  etiam  ultra  progressa  est  mea  sollicitudo:  tuum  erat  ea  alere,  ego  tamen  has  etiam  partes  in  me  suscepi.  Quare  tametsi  constitutus  es  tanquam  paterfamilias  in  mundo,  non  est  tamen  quod  de  animalium  victu  multum  sis  sollicitus.  Hinc  colligunt  usque  ad  diluvium  herbis  ac  fructibus  contentos  fuisse  homines,  nec  fas  illis  fuisse  carne  vesci.  Idque  magis  probabile  videtur:  victum  enim  hominis  quodammodo  inter  certos  fines  concludit  Deus.  Deinde  post  diluvium  nominatim  carnes  concedet.  Quanquam  non  satis  firmae  sunt  istae  rationes:  adduci  enim  potest  in  contrariam  partem,  quod  sacrificia  primi  homines  offerebant  ex  pecudibus.  Haec  porro  lex  est  rite  offerendi,  non  offerre  Deo  nisi  quae  nobis  in  usum  concessit.  Deinde  vestiebantur  pellibus;  ergo  animalia  illis  occidere  licuit.  Itaque  satius  fore  arbitror,  si  ea  de  re  nihil  asseramus.  Nobis  sufficiat,  herbas  et  fructus  arborum  illis  dari  pro  victu  ordinario:  non  tamen  dubium  est  quin  abunde  id  fuerit  ad  summas  delicias.  Prudenter  enim  sentiunt  qui  terram  sic  a  diluvio  dicunt  corruptam  fuisse,  ut  vix  mediocrem  habeamus  gustum  primae  illius  benedictionis:  imo  statim  post  lapsum  hominis  iam  degeneres  ac  vitiosos  fructus  proferre  coepit.  Sed  tunc  maior  facta  est  mutatio.  Utcunque  sit,  Deus  certe  noluit  tenuiter  et  maligne  alere  homines:  sed  potius  his  verbis  liberalem  copiam  praedicat,  cui  ad  suavem  et  iucun-