55:288  persuasum  et  animis  nostris  infixum  esset,  quis  superbiendo  auderet  bellum  cum  Deo  suscipere?  Nunc  spes  impunitatis  facit  ut  in  coelum  usque  cornu  attollere  non  horreamus.  Sit  igitur  haec  Petri  sententia,  quasi  coeleste  fulmen  ad  humiliandos  homines.  Caeterum  humiles  vocat  qui  omni  propriae  virtutis,  sapientiae,  et  iustitiae  fiducia  exinaniti,  quidquid  boni  est,  in  solo  Deo  quaerunt.  Si  non  nisi  hac  via  ad  Deum  pervenitur,  quis  non  propriae  gloriae  oblitus,  libenter  submittere  se  debet?  6.  Humiliamini  ergo.  Semper  tenendum  est  in  quem  finem  nos  coram  Deo  humiles  esse  iubeat:  ut  scilicet  faciles  atque  humani  fratribus  simus,  nec  recusemus  nos  illis  subiicere  quantum  postulat  caritatis  ratio.  Ergo  qui  fastuosi  sunt  vel  praefracti  erga  homines,  eos  dicit  adversus  Deum  protervire.  Proinde  hortatur  omnes  pios,  ut  Dei  potentiae  se  subiiciant.  Et  manum  Dei  p  o  t  e  n  t  em  vocat,  quo  plus  incutiat  terroris.  Tametsi  enim  perpetuum  est  manus  Dei  epithetum:  hic  tamen  ad  praesentis  causae  circumstantiam  accommodatur,  caeterum  quia  timere  vulgo  solemus,  ne  damno  sit  nobis  nostra  humilitas,  et  alii  hac  occasione  magis  insolescant:  occurrit  Petrus,  ac  eminentiam  promittit  omnibus  qui  se  submiserint.  Sed  addit  in  tempore,  ut  nimiae  festinationi  simul  obviam  eat.  Significat  ergo  opus  esse  ut  humilitatem  ad  tempus  discamus:  Dominum  vero  satis  tenere  quando  nos  attolli  expediat.  Ita  eius  consilio  permittere  nos  decet.  7.  Omni  cura  vestra.  Expressius  adhuc  nobis  commendat  Dei  providentiam.  Unde  enim  haec  proverbia,  ululandum  esse  inter  lupos:  item,  stultos  esse  qui  ovibus  sunt  similes,  quia  lupis  se  vorandos  exponunt:  nisi  quia  putamus  nostra  modestia  fraenum  laxari  impiorum  audaciae,  ut  petulantius  nobis  insultent?  Porro  hic  motus  ex  divinae  providentiae  ignorantia  nascitur.  Contra  autem  simul  atque  hoc  constitutum  fuerit,  curam  nostri  esse  Deo,  facile  ad  patientiam  et  mansuetudinem  compositi  erunt  animi.  Ergo  ne  hominum  improbitas  ad  ferociam  nos  sollicitet,  hoc  remedium  praescribit  apostolus,  sicut  et  David  psalmo  tricesimoseptimo,  ut  cura  nostra  in  Deum  reiecta  interim  quiescamus.  Nam  qui  in  Dei  providentiam  non  recumbunt,  eos  omnes  assidue  secum  tumultuari  necesse  est,  et  violento  impetu  adversus  alios  ruere.  Quo  magis  in  hanc  meditationem  incumbere  nos  oportet,  Deum  habere  curam  nostri:  primum  ut  pax  nobis  interne  constet:  deinde  ut  erga  homines  modesti  mansuetique  simus.  Caeterum  non  ita  iubemur  coniicere  omnem  in  Deum  curam,  quasi  nos  lapideis  cordibus  praeditos,  omnique  sensu  privatos  esse  Deus  velit:  sed  ne  trepidatio  vel  anxietas  nimia  ad  impatientiam  nos  impellat.  Similiter  divinae  providentiae  cognitio  non  ita  omni  cura  liberat,  ut  secure  sibi  homines  indui-