52:288  vel  socordia  pessum  eat.  Si  hominibus  tantum  datur,  quanto  pius  Deo  ipsi  dandum  erit?  Porro  ecclesiam  suam  hoc  nomine  non  frustra  Deus  ipse  dignatur  :  utpote  qui  non  modo  nos  adoptionis  gratia  in  filios  recepit,  sed  etiam  in  medio  nostri  habitat.  Accedit  non  vulgaris  amplificatio,  ex  eo  quod  vocat  columnam  et  firmamentum  veritatis.  Quid  enim  magnificentius  potuit  dici?  Quid  aeterna  illa  veritate  augustius,  magisque  sacrosanctum,  qua  et  Dei  gloria  et  hominum  salus  continetur?  Si  in  unum  cumulum  congerantur  omnes  profanae  philosophiae  laudes  quibus  a  suis  sectatoribus  ornatur,  quid  hoc  ad  dignitatem  coelestis  huius  sapientiae,  quae  sola  et  lux,  et  veritas,  et  doctrina  vitae,  et  via,  et  regnum  Dei  praedicari  meretur?  Atqui  ea  solius  ecclesiae  ministerio  in  terris  conservatur:  quantum  ergo  onus  pastoribus  incumbit,  qui  tam  inaestimabilis  thesauri  custodiae  praesunt?  Impudenter  autem  nugantur  papistae,  qui  colligunt  ex  Pauli  verbis  sua  omnia  deliria  pro  Dei  oraculis  habenda  esse:  quia  sint  columna  veritatis,  ideoque  errare  nequeant.  Primo  videndum  est  quorsum  Paulus  ecclesiam  insigniat  tam  splendido  titulo.  Procul  dubio  voluit,  proposita  officii  magnitudine,  admonitos  esse  pastores  quanta  illud  fide,  diligentia,  reverentia  administrare  debeant.  Etenim  quam  horribilis  futura  est  ultio,  si  eorum  culpa  intercidat  illa  veritas  quae  imago  est  divinae  gloriae,  lux  mundi,  salus  hominum?  Haec  sane  cogitatio  trepidationem  assiduam-debet  incutere  pastoribus:  non  ut  eos  exanimet,  sed  ad  maiorem  vigilantiam  acuat.  Inde  colligere  promptum  est  quo  sensu  Paulus  ita  loquatur.  Ecclesia  enim  ideo  columna  est  veritatis,  quia  suo  ministerio  eam  tuetur  ac  propagat.  Deus  non  descendit  ipse  e  coelo  ad  nos,  neque  angelos  quotidie  mittit  ad  suam  veritatem  promulgandam:  sed  utitur  pastorum  opera,  quos  in  hunc  finem  ordinavit.  Ut  crassius  exprimam:  nonne  ecclesia  mater  est  piorum  omnium,  quae  ipsos  regenerat  Dei  verbo,  quae  educat  aliique  tota  vita,  quae  confirmat,  quae  ad  solidam  perfectionem  usque  perducit?  Eadem  quoque  ratione  columna  veritatis  praedicatur:  quia  doctrinae  administrandae  munus,  quod  Deus  penes  eam  deposuit,  unicum  est  instrumentum  retinendae  veritatis,  ne  ex  hominum  memoria  pereat.  Ergo  elogium  hoc  ad  ministerium,  verbi  refertur:  quo  sublato,  concidet  Dei  veritas.  Non  quia  per  se  minus  firma  sit,  nisi  hominum  humeris  fulciatur,  quemadmodum  etiam  iidem  papistae  blatterant.  Nam  ista  est  exsecrabilis  blasphemia,  incertum  esse  Dei  verbum  donec  ab  hominibus  certitudinem  quasi  precario  mutuetur.  Simpliciter  intelligit  Paulus  quod  aliis  verbis  tradit  decimo  ad  Romanos  capite  (v.  17):  quoniam  fides  est  ex  auditu,  nullam  fore  nisi  sit  praedicatio.  Itaque  hominum  respectu  sustinet  ecclesia  veritatem^