50:288  qu'il  se  monstre  liberal:  tellement  que  nous  puissions  avoir  occasion  de  magnifier  sa  bonte.  Mais  cependant  pour  ce  que  tous  les  biens  de  ce  monde  ne  nous  peuvent  tourner  qu'a  mal  iusques  a  ce  que  Dieu  nous  soit  propice,  voila  pourquoy  S.  Paul  tient  cest  ordre:  il  met  tousiours  la  grace  de  Dieu,  ou  sa  faveur  gratuite  devant  les  biens  qu'il  nous  eslargit.  Combien  donc  que  nous  devions  demander  a  Dieu  qu'il  nous  face  sentir  sa  bonte  en  tout  ce  qu'il  cognoist  nous  estre  propre,  si  ne  faut-il  point  oublier  le  principal,  a  scavoir  qu'il  nous  tienne  de  son  Eglise,  et  que  nous  ayons  ce  tesmoignage  en  nos  coeurs  qu'il  nous  porte  faveur:  quand  nous  verrons  ceste  clairte  la,  qu'il  nous  suffise  (comme  il  en  est  parle  au  Pseaume,  et  que  cela  nous  contente.  Or  cependant  combien  que  Dieu  nous  permette  de  souhaiter  tout  ce  qui  nous  est  bon:  si  est-ce  qu'encore  nous  faut-il  restreindre  en  telle  bride,  que  s'il  nous  veut  affliger  par  beaucoup  de  miseres,  toutesfois  que  nous  devons  tellement  priser  sa  grace,  que  elle  nous  suffise  seule,  encore  que  le  reste  nous  fust  oste.  Nous  avons  desia  dit  que  si  nous  estions  a  nostre  aise  en  toutes  voluptez  et  delices,  toutesfois  malheur  sur  nous  iusques  a  tant  que  nous  ayons  ce  repos  en  nos  consciences,  que  Dieu  nous  aime,  et  que  nous  luy  sommes  agreables.  Voila  donc  comme  tous  les  biens  ne  nous  doivent  point  estre  desirables,  sinon  que  l'amour  de  Dieu  marche  devant.  Mais  a  l'opposite  quand  Dieu  nous  aimera,  et  cependant  il  voudra  esprouver  nostre  patience,  nous  laissant  languir  en  ce  monde,  nous  assubietissant  a  beaucoup  d'afflictions:  si  faut-il  neantmoins  tellement  priser  son  amour,  que  nous  portions  patiemment  le  tout,  encores  qu'il  semble  que  cela  nous  soit  contraire.  Et  d'autant  plus  nous  faut-il  bien  recorder  ceste  lecon,  que  nous  voyons  les  hommes  esgarez  en  leurs  appetis.  Car  la  pluspart  sont  abrutis  en  telle  sorte  qu'ils  ne  desirent  sinon  d'avoir  ce  que  nature  enseigne  leur  estre  propre:  ils  ne  regardent  point  a  Dieu.  L'un  demandera  a  boire,  l'autre  a  manger,  l'autre  d'estre  vestu  :  mais  ce  sont  des  souhaits  qui  volent  en  Iair.  Or  il  faloit  commencer  par  ce  bout  la  de  cognoistre  que  Dieu  est  autheur  de  ce  qui  nous  est  bon,  et  qu'autant  de  commoditez  que  nous  avons  en  ce  monde,  autant  d'aides  que  nous  avons  pour  nous  subvenir,  ce  sont  autant  de  benefices  procedans  de  sa  main.  Si  donc  nous  ne  pouvons  adresser  nos  desirs  a  Dieu,  c'est  une  chose  par  trop  confuse,  voire  brutale  du  tout.  Or  si  est-ce  que  la  plus  part  du  monde  est  ainsi.  Il  y  a  en  d'autres  qui  semblent  tenir  meilleur  ordre  et  reigle:  mais  cependant  encores  ils  pervertissent