41:288  veteris  illius,  quem  Deus  exercuit  multis  tum  periculis  tum  afflictionibus.  Dicit  ergo  angelus,  etiam  si  duriter  et  aspere  tractati  fuerint  fideles  sub  lege  et  prophetis,  tamen  instare  tempus  magis  molestum,  quoniam  Deus  probabit  ecclesiam  suam  multo  severius  quam  antea:  et  ideo  subiiciet  eam  variis  generibus  crucis.  Huc  spectant  haec  verba,  tempus  hoc  futurum  afflictionibus  plenum,  quales  visae  non  fuerant  ex  quo  coeperunt  esse  gentes,  hoc  est,  ex  quo  creatus  est  mundus:  vel  si  hoc  referre  ad  populum  ipsum  placeat,  apta  etiam  erit  expositio,  nempe  quamvis  semper  in  speciem  misera  fuerit  ecclesia,  fore  tamen  calamitosam,  Christo  exhibito,  magis  quam  antea  fuerit.  Scimus  quid  dicatur  in  Psalmo  (129,1),  Saepe  oppugnarunt  me  a  iuventute  mea,  traxerunt  impii  super  dorsum  meum  aratrum.  Ergo  omnibus  saeculis  subiecit  Deus  ecclesiam  suam  multis  malis  et  incommodis.  Sed  hic  ponitur  comparatio  veteris  et  novi  populi,  et  angelus  diserte  exprimit,  postquam  apparuerit  Christus  mundo,  ecclesiam  adeo  quietam  et  felicem  non  fore,  ut  longe  gravioribus  malis  premenda  sit,  quia  non  mirum  est,  si  pater  vult  nos  configurari  filio  suo  unigenito.  Et  quoniam  Christus  a  morte  resurrexit,  etiam  si  durior  militia  nos  maneat,  tamen  aequo  animo  hoc  ferendum  est,  quia  ante  oculos  nobis  versatur  coelestis  gloria,  quae  patribus  longe  fuit  obscurior.  Tandem  subiicit,  In  tempore  illo  servabitur  populus  tuus.  Hic  expressius  docet  angelus  quantum  momenti  futurum  sit  in  praesidio  Michaelis.  Promittit  igitur  certam  salutem  electo  populo,  quasi  diceret,  Quamvis  periclitetur  miseris  modis  ecclesia,  tamen  respectu  Dei  ipsius  semper  fore  tutam  et  extra  omne  discrimen,  quoniam  superior  erit  Michael  cunctis  hostibus.  Ubi  ergo  angelus  hic  hortatur  fideles  ad  crucis  tolerantiam,  ostendit  simul  non  pugnaturos  dubio  eventu,  quoniam  illis  reposita  est  victoria.  Quamvis  itaque  haec  prophetia  primo  intuitu  possit  gignere  nobis  et  metum  et  horrorem:  tamen  sufficere  debet  quod  opponitur  solatium,  nempe  nos  in  ipso  proelio  iam  esse  victores,  inter  ignes  et  gladios:  denique  inter  multas  mortes,  certos  tamen  esse  de  vita.  Quoniam  ergo  salus  hic  nobis  proponitur,  securos  esse  oportet,  et  alacriter  descendere  in  omnes  pugnas,  quia  quantum  ad  nos,  pugnandum  quidem  est,  sed  Christus  nobis  vicit,  quemadmodum  etiam  ipse  loquitur,  Confidite,  ego  vici  mundum  (Ioan.  16,  33).  Caeterum  postea  restringit  angelus  per  modum  correctionis  quod  generaliter  dixerat.  Multi  enim  tunc  profitebantur  se  esse  ex  populo  Dei:  nemo  erat  ex  tota  gente,  qui  non  iactaret  se  progenitum  esse  ex  semine  sancto.  Quum  ergo  censeri  omnes  promiscue  vellent  in  populo  Dei,  angelus  hic  restringit  quod  dixit  de  populo,  nempe  cunctus  populus,  qui  inventus  fuerit  in  libro  scriptus,  inquit.  Hac  particula  significat  non  omnes,  qui  sunt  ex  Israele  secundum  car-