29:288  fruimur  a  Deo,  quod  nimirum  ab  ipso  nihil  exspectemus,  ac  veluti  clausum  os  habeamus,  quum  contra  in  angustiis  constituti  et  maximis  hinc  inde  periculis  velut  obruti,  tunc  aperto  ad  dominum  ore  clamantes,  res  ab  ipso  meliores  exspectemus.  Quid  hic  autem  agat  Dominus?  Nam,  oro,  quibus  obicibus  et  repagulis  Dei  beneficii  erga  nos  ostium  occludimus?  Quare  discendum  Annae  exemplo  est,  tunc  nobis  gaudendum  esse  maxime,  quum  maxime  turbulenta  erunt  omnia:  ac  licet  nullas  miseriarum  finis  aut  exitus  appareat:  Dei  verbum  in  tenebris  densissimis  tanquam  ardentissimam  facem  nobis  sequendum,  quae  prius  occulta  patefaciat  :  et  adversus  nostram  infirmitatem  dimicandum  tamdiu,  dum  a  Deo  sufficientibus  viribus  instructi  audacter  adversus  quaecunque  pericula  subsistamus.  Caeterum  vocem  illam  Cornu  scriptura  frequenter  pro  vi  et  robore  usurpat.  Anna  ergo  dicit  suum  cornu  sic  exaltatum,  quemadmodum  alibi  Deus  regis  sui  cornu  dicitur  exaltasse,  id  est  robur  ac  potentiam.  Quare  se  a  Deo  confirmatam  palam  profitetur:  quasi  dicat  non  evenisse  sibi  tantum  a  Domino  beneficium,  nisi  speranti  et  divinum  favorem  tandem  aliquando  venturum  patienter  exspectanti.  Digna  vox  quam  diligenter  observemus,  quum  miseros  mortales  tamen  plerumque  sua  ipsorum  virtute  ac  fortitudine  gloriari  videamus,  adeoque  nimis  insolescere.  Sed  firma  et  stabilis  laetitia  nobis  quaerenda  est,  quam  nulla  tempestas  interturbet.  Nam  multos  quidem  laetari,  sed  ludicris,  videas.  Sic  divites  suis  opibus,  ebriosos  abdomine  suo  gaudere  conspicimus.  Sed  heu  quam  lamentabile  gaudium  quod  sine  Domino  quaeritur;  sane  magno  illud  constabit.  Idem  esto  de  iis  qui  viribus  propriis  et  fortunis  laetantur  iudicium:  nam  iusto  Dei  iudicio  in  tristitiam  ac  moerorem  sunt  desiturae:  quemadmodum  nos  ipse  Dominus  noster  Iesus  Christus  admonet.  Nae  magnum  arrogantiae  testimonium  est,  si  in  nobis  ipsis  aut  industria  nostri*  laetitiae  quaerimus  materiam,  quae  tandem  nonnisi  confusionem  iustam  temeritatis  et  arrogantiae  poenam  parit.  Quamobrem  ex  hoc  loco  teneamus,  minime  unquam  dubitandum  quin  Deus  nos  exhilaret  ac  necessaria  omnia  nobis  suppeditet,  modo  ad  eum  confugientes  patienter  gratiam  eius  exspectemus,  ac  in  afflictionibus  unicum  asylum  nostrum  et  auxilium  agnoscamus.  Addit  Anna  suum  os  dilatatum  super  inimicos  suos,  nempe  quod  prius  habita  ludibrio  dolorem  silentio  premere  cogeretur.  Sic  de  se  Davidem  Psal.  39  loquentem  videmus,  quum  ait  se  dominantibus  improbis  prorsus  obmutuisse.  Et  singulari  observatione  digna  est  haec  doctrina,  ex  qua  discamus  florentibus  impiis  et  triumphantibus  oportere  nos  oris  claustra,  ut  loquitur  propheta,  custodire,  ac  dum  nobis  os  Deus  aperiat  in  silentio  et  pati-