25:288  praepostera  sua  cupiditate,  sed  quia  iam  tergiversandi  non  erat  locus,  pedem  loco  movere  ausus  non  est:  ac  si  Deus  iniecta  manu  eum  retineret.  Quod  dicitur  spiritus  Dei  super  hunc  fuisse  postquam  oculos  convertit  ad  desertum,  et  aspexit  castra  Israel,  ut  per  tribus  suas  erant  disposita,  sic  intellige,  non  sincero  benevolentiae  affectu  fuisse  inductum,  ut  conspectus  ipse  benedicendi  materiam  suggereret:  sed  eiusdem  spiritus  instinctu  fuisse  tractum,  qui  postea  vim  suam  in  vaticinio  exseruit.  Dicitur  ergo  fuisse  super  eum  spiritus  Dei,  non  quod  illo  demum  momento  coeperit  eum  afflare  postquam  oculos  coniecerat  in  castra  Israel:  sed  eum  impulit  ad  illius  loci  vel  plagae  inspectionem,  ut  vehementior  esset  vaticinandi  impetus,  quasi  in  re  praesenti.  Postquam  autem  eius  sensus  ita  perculit,  vel  saltem  praeparavit,  ut  apta  essent  organa  ad  munus  exsequendum,  nunc  linguam  quoque  eius  ad  prophetandum  direxit:  sed  insigni  modo,  ut  in  subita  mutatione  fulgeret  divina  maiestas:  ac  si  mutatus  esset  in  novum  hominem.  Denique  super  eum  fuit  spiritus  Dei,  dum  ostendit  manifestis  signis  se  esse  sermonis  autorem,  nec  illum  ex  proprio  sensu  loqui.  Eadem  ratione  dicitur  sumpsisse  parabolam:  quia  insolita  gravitate  et  magnifico  splendore  notabile  fuit  dicendi  genus.  3.  Dicit  vir  reconditus  oculo.  Non  alio  tendit  tota  praefatio  nisi  ut  se  verum  Dei  prophetam  esse  probet,  ac  benedictionem  quam  proferet  se  habere  ex  coelesti  oraculo.  Et  vera  quidem  gloriatio  fuit  quoad  hunc  specialem  actum:  fieri  tamen  potest,  ut  eum  ad  se  iactandum  impulerit  fastus  et  ambitio.  Quanquam  probabile  est  impulsu  spiritus  sic  fuisse  praefatum,  quo  plus  fidei  suis  dictis  assereret.  Caeterum  ex  hoc  consilio  licet  sensum  verborum  colligere.  Elogiis  se  ornat  Balaam  quibus  propheticum  munus  sibi  arroget.  Ergo  quaecunque  de  se  praedicat  sciendum  est  competere  in  veros  Dei  prophetas  quorum  notas  et  insignia  mutuatur.  In  hunc  finem  dicit  se  absconditum  esse  oculo:  quo  significat  non  vulgari  more  se  videre,  sed  pollere  arcanis  visionibus.  Consentiunt  interpretes  Qnitf  tantundem  valere  ac  DflD,  hoc  est  clausum  vel  absconditum.  Itaque  vertunt  quidam  in  tempore  plusquamperfecto:  Vir  cui  clausus  erat  oculus:  et  hoc  intelligunt  de  caecitate  Balaam,  quum  clarius  videret  eius  asina  quam  ipse.  Alii  quia  vident  id  commentum  nimis  esse  dilutum,  per  antiphrasin  exponunt:  Cui  apertus  est  oculus.  Sed  quoniam  haec  etiam  interpretatio  coacta  est,  non  dubito  quin  absconditos  sibi  esse  oculos  dicat,  quia  arcana  inspectione  pollent  supra  humanum  modum.  Nam  vocem  hanc  usurpat  David  (Ps.  51,  8)  pro  mysteriis,  quum  dicit:  Abscondita  sapientiae  manifestasti  mihi.  Nisi  forte  placeat,  hominem  vocari  absconditis