49:287  287  EPIST.  PAULI  AD  ROMANOS  288  16.  Salutate  vos  in  osculo  sancto*  Osculum  frequens  ac  pervulgatum  benevolentiae  symbolum  fuisse  apud  Iudaeos,  passim  ex  scripturis  liquet.  Apud  Romanos  minus  fortasse  usitatum  :  neque  tamen  insolens  erat,  nisi  quod  mulieres  osculari  non  licebat,  praeterquam  solis  cognatis.  Illud  tamen  in  morem  transiit  apud  veteres,  ut  Christiani  ante  coenae  communicationem  se  mutuo  oscularentur,  ad  testandam  eo  signo  amicitiam  :  deinde  eleemosynas  conferrent,  ut  id,  quod  repraesentaverant  osculo,  re  quoque  et  effectu  comprobaret:  quemadmodum  apparet  ex  quadam  Chrysostomi  homilia.  Hinc  fluxit  ritus  ille,  qui  hodie  est  apud  papistas,  osculandae  patenae  et  conferendae  oblationis.  Quorum  alterum  merae  est  superstitionis,  sine  ullo  fructu  :  alterum  non  alio  facit,  nisi  ad  explendam  sacerdotum  avaritiam,  si  tamen  expleri  posset.  Non  tamen  videtur  Paulus  caeremoniam  hic  praecise  exigere,  sed  tantum  eos  hortatur  ad  fovendum  fraternum  amorem,  quem  a  profanis  mundi  amicitiis  discernit,  quae  utplurimum  vel  fucosae  sunt,  vel  sceleribus  conflatae,  vel  retinentur  malis  artibus,  nunquam  vero  in  rectum  finem  tendunt  Salutem  ab  ecclesiis  adscribens,  quantum  in  se  est,  mutuo  amoris  nexu  devincire  inter  se  studet  omnia  Christi  membra.  17.  Obsecro  autem  vos  fratres,  ut  observetis  eos  qui  dissidia  et  offensiones  contra  doctrinam,  quam  vos  didicistis,  excitant,  et  ut  declinetis  ab  illis.  18.  Qui  enim  tales  sunt,  Christo  Domino  non  serviunt,  sed  suo  ventri:  ac  per  blandiloquentiam  et  assentationem  decipiunt  corda  simplicium:  19.  vestra  quidem  obedientia  ad  omnes  permanavit.  Gaudeo  igitur  de  vobis:  sed  volo  vos  sapientes  esse  ad  bonum,  simplices  vero  ad  malum.  20.  Deus  autem  pacis  conteret  brevi  Satanam  sub  pedibus  vestris.  Gratia  Domini  nostri  Iesu  Christi  sit  vobiscum.  Amen.  17.  Obsecro  autem,  ete.  Nunc  adhortationem  ponit,  qua  necesse  habent  subinde  vellicari  ecclesiae  omnes  :  quia  occasionibus  perpetuo  imminent  Satanae  ministri  ad  turbandum  Christi  regnum.  Duobus  autem  modis  turbationem  hanc  moliuntur:  nam  aut  dissidia  seminant,  quibus  distrahantur  animi  ab  unitate  veritatis:  aut  offensiones  suscitant  quibus  ab  amore  evangelii  alienentur.  Illud  fit  dum  novis  et  humanitus  excogitatis  dogmatibus  dissipatur  Dei  veritas:  hoc,  dum  variis  artibus  odiosa  vel  contemptibilis  redditur.  Quicunque  ergo  alterutrum  faciunt,  eos  ipbet  observari,  ne  decipiant  ac  incautos  deprehendant  :  deinde  vitari,  quia  noxii  sunt.  Nec  abs  re  attentionem  hic  a  fidelibus  requirit:  quia  saepe  fit  nostra  socordia  vel  incuria,  ut  multum  damni  ecclesiae  inferant  pravi  nebulones  antequam  illis  obviam  eatur:  deinde  mira  saepe  vafritie  ad  nocendum  obrepunt,  nisi  prudenter  considerentur.  Observa  autem