41:287  287  PRAELECTIONES  288  magnum  populi.  Res  satis  nota  est.  Liber  enim  apud  me  exstat  si  quis  mihi  non  habeat  fidem.  Diximus  hesterna  lectione  angelum  initio  duodecimi  capitis  praedicere  qualis  futurus  esset  ecclesiae  status  post  Christum  manifestatum,  nempe  refertus  multis  miseriis  :  diximus  etiam  lenire  moerorem  Danielis  et  piorum  omnium,  quoniam  promittit  salvam  nihilominus  fore  ecclesiam  Dei  auxilio.  Constituit  vero  Daniel  Michaelem  custodem  ecclesiae,  quia  Deus  has  partes  Christo  iniunxit,  quemadmodum  testatur  ipse  10.  cap.  Ioannis  v.  28.  29  quanquam,  ut  heri  diximus,  potest  etiam  locus  de  angelo  exponi.  Sed  quia  Christi  personae  hoc  optime  convenit,  nempe  stare  pro  defensione  electi  populi,  ego  libenter  amplector  eorum  sententiam  qui  ad  Christi  personam  referunt.  Et  vocatur  Princeps  magnus,  quia  necesse  fuit  opponi  invictam  Dei  fortitudinem  tot  periculis,  quibus  obnoxiam  fore  ecclesiam  dicit  angelus.  Scimus  quam  levibus  de  causis  saepe  horror  mentes  nostras  occupet:  et  ubi  coepimus  trepidare  nihil  potest  sedare  nostros  tumultus  et  perturbationes.  Ergo  quoniam  angelus  hic  disserit  de  gravissimis  certaminibus,  et  ex  quibus  instabit  periculum  exitii  ecclesiae,  ideo  vocat  Michaelem  principem  magnum,  quasi  diceret.  Michael  qui  custos  erit  ac  praeses  electi  populi,  exseret  immensam  Dei  potentiam,  ut  minime  dubitandum  sit  quin  ad  suos  tuendos  sufficiat.  Idem  confirmat  Christus,  ut  nuper  attigi  Ioannis  10.  cap.  Dicit  enim  omnes  electos  sibi  a  patre  datos  esse,  et  neminem  ex  illis  periturum,  quia  pater  maior  est  omnibus,  inquit,  nemo  rapiet  oves  meas  e  manu  mea.  Pater  enim  qui  dedit  mihi,  maior  est  omnibus,  hoc  est,  Deus  quidquid  habet  potentiae,  quod  est  infinitum,  ostendet  pro  salute  eorum  quos  elegit  ante  creatum  mundum,  et  mihi  commisit,  vel  deposuit  in  manu  mea.  Nunc  ergo  tenemus  rationem  huius  epitheti  quum  vocatur  Michael  magnus  princeps.  Nam  pro  magnitudine  certaminum  oportuit  etiam  nobis  proponi  virtutem  quae  sit  insuperabilis,  ut  inter  maximos  motus  tamen  simus  tranquilli.  Quod  autem  praedicit  angelus  tantas  calamitates  instare  ecclesiae,  non  fuit  illo  tempore  supervacuum  :  et  hodie  etiam  nobis  inprimis  utile  est.  Videmus  ut  Iudaei  felicem  statum  imaginati  sint  sub  Christo:  et  apostolos  tenebat  error  ille,  quoniam  simul  ac  apud  ipsos  disseruit  Christus  de  excidio  templi  et  urbis,  putarunt  finem  adesse  mundi,  et  ita  nihil  illis  venit  in  mentem  praeter  gloriam  et  triumphos.  Propheta  igitur  hic  edoctus  fuit  ab  angelo,  Deum  sic  gesturum  curam  ecclesiae  suae,  ubi  filium  unigenitum  manifestaverit,  ut  tamen  maneat  pios  omnes  dura  conditio,  quasi  diceret  nondum  adesse  tempus  triumphandi,  sed  pergendum  esse  in  militia,  et  quidem  dura  et  laboriosa.  Nam  hic  confertur  novi  populi  conditio  cum  miseriis