51:286  de  sa  mort  est  pour  nous  acquerir  un  appointement  perpetuel,  en  sorte  qu'il  nous  faut  tousiours  la  avoir  nostre  refuge.  Il  est  vray  que  nostre  Seigneur  Iesus  s'est  bien  constitue  pour  rancon  en  toute  sa  vie:  car  l'obeissance  qu'il  a  rendue  en  ce  monde  a  Dieu  son  Pere.  a  este  pour  reparer  l'offense  d'Adam,  et  toutes  les  iniquitez  dont  nous  sommes  redevables.  Mais  sainct  Paul  notamment  parle  ici  de  son  sang,  pource  qu'il  nous  faut  addresser  a  sa  mort  et  passion,  comme  au  sacrifice  qui  a  la  vertu  d'effacer  toutes  iniquitez.  Et  pour  ceste  cause  sous  la  Loy,  Dieu  a  represente  en  figure  que  les  hommes  ne  pouvoyent  estre  reconciliez  avec  luy  sinon  par  ce  moyen.  Or  ils  est  vray  que  non  seulement  Iesus  Christ  a  espandu  son  sang,  mesmes  en  sa  mort:  mais  il  a  senti  les  frayeurs  et  espovantemens  qui  devoyent  estre  sur  nous.  Mais  sainct  Paul  sous  une  espece  comprend  ici  le  tout,  a  la  facon  commune  de  l'Escriture  saincte.  En  somme,  que  nous  apprenions  d'avoir  toute  nostre  iustice,  en  ce  que  Dieu  par  sa  pure  bonte  se  monstre  pitoyable  envers  nous.  Et  ne  presumons  point  de  luy  mettre  en  avant  quelque  vertu  pour  l'obliger  a  nous:  mais  qu'il  nous  suffise  qu'il  nous  recoyve  en  son  amour  purement,  sans  que  nous  en  soyons  dignes,  voire  d'autant  que  la  memoire  de  nos  pechez  est  ensevelie  devant  sa  face.  Et  puis  cognoissons  que  cela  ne  peut  estre  sans  la  mort  et  passion  de  nostre  Seigneur  Iesus  Christ,  et  que  la  aussi  il  nous  faut  arrester  du  tout.  La  dessus  sainct  Paul  adiouste,  que  le  tout  est  selon  les  richesses  de  la  grace  de  Dieu.  Non  sans  cause  il  magnifie  ici  la  misericorde  laquelle  Dieu  desploye  en  nous  recevant  a  merci.  Car  nous  voyons  d'un  coste  comme  les  hommes  s'abusent  volontiers  en  leur  fole  outrecuidance.  Car  tousiours  la  plus  part  a  cuide  appointer  avec  Dieu  par  leurs  satisfactions  et  subterfuges  ie  ne  scay  quels.  D'autant  donc  que  les  hommes  sont  ainsi  abusez  en  leurs  fantasies,  S.  Paul  pour  exclure  tout  cela,  dit  que  nous  devons  estre  ravis  en  ces  richesses  de  la  grace  de  Dieu.  Ii  pouvoit  dire  simplement  que  Dieu  fait  le  tout  selon  sa  grace:  mais  il  met  ici  de  grans  thresors,  a  fin  que  les  hommes  ne  soyent  point  si  fols  d'apporter  comme  une  maille,  quand  il  y  aura  un  million  d'escus.  Et  de  faict,  les  Papistes  quand  ils  parlent  de  leurs  satisfactions,  ne  diront  pas  qu'ils  puissent  suffire  du  tout  a  cela:  mais  ils  cuident  qu'avec  la  mort  et  passion  de  Iesus  Christ  ils  apporteront  aussi  du  leur,  et  feront  tellement  par  lopins  et  morceaux  que  Dieu  sera  contente  et  appaise.  Voila  donc  l'opinion  diabolique  qui  regne  en  la  Papaute:  car  ils  fonderont  des  Messes,  ils  barboteront  beaucoup,  ils  troteront  en  pelerinage,  ils  garderont  une  telle  feste,  ils  feront  ie  ne  scay  quelle  devotion,  ils  porteront  la  haire  au  besoin:  et  le  tout  a  fin  d'aider  a  la  mort  et  passion  de