50:286  mesurions  point  l'Evangile  selon  le  regard  et  la  reputation  de  ceux  qui  parlent  a  nous,  car  ils  sont  hommes  fragiles.  Ce  n'est  pas  chose  qui  nous  doyve  aussi  retenir,  pour  dire  que  nous  soyons  asseurez  de  nostre  salut  sur  le  credit  des  hommes  qui  nous  pourroyent  faire  arrester  en  ce  monde:  mais  cognoissons  que  c'est  Iesus  Christ  qui  parle.  Et  comment?  En  la  maieste  qui  luy  a  este  donnee  de  Dieu  son  Pere:  car  la  vertu  du  S.  Esprit  s'est  declaree  alors  pleinement  quand  il  est  ressuscite  des  morts.  Puis  qu'ainsi  est  donc  que  nostre  Seigneur  Iesus  Christ  s'est  acquis  une  telle  authorite,  quand  il  a  este  esleve  la  haut  au  ciel,  et  qu'il  a  toute  superiorite  sur  toutes  creatures:  que  nous  apprenions  de  nous  renger  sous  luy,  et  que  cela  soit  pour  nous  tenir  en  bride,  que  sa  Parole  soit  receue  de  nous  et  que  nous  scachions  qu'il  nous  gouverne,  et  faut  que  nous  souffrions  d'estre  enseignez  en  son  nom,  et  que  sa  Parole  qui  nous  est  preschee,  combien  qu'elle  procede  de  la  bouche  des  hommes,  si  est-ce  que  c'est  en  l'authorite  de  Dieu,  et  que  nostre  salut  doit  estre  fonde  la  dessus  aussi  bien  que  si  le  ciel  s'ouvroit  cent  mille  fois  pour  nous  manifester  la  gloire  de  Dieu.  Voila  (di-ie)  comme  il  faut  que  nous  soyons  enseignez  en  ce  monde  iusques  a  ce  que  Dieu  nous  ait  recueillis  en  son  heritage  eternel.  Et  c'est  ce  que  nous  avons  a  retenir,  quand  notamment  la  gloire  de  nostre  Seigneur  Iesus  Christ  nous  est  ici  mise  en  avant.  Or  nous  nous  prosternerons  devant  la  maieste  de  nostre  bon  Dieu,  en  cognoissance  de  nos  fautes,  le  priant  qu'il  luy  plaise  de  nous  les  faire  sentir,  a  fin  de  nous  attirer  a  une  meilleure  repentance.  Et  que  nous  esperions  tousiours,  si  nous  avons  este  renouvelez  par  luy,  que  vrayement  nous  sentirons  que  c'est  luy  qui  nous  gouverne  par  son  S.  Esprit:  et  qu'ayans  ce  tesmoignage  imprime  en  nos  coeurs,  nous  puissions  nous  glorifier  sans  hypocrisie,  que  vivans  en  ce  monde,  nous  n'y  sommes  point  retenus:  et  que  nous  y  habitons  comme  pelerins  et  etrangers,  d'autant  que  nous  avons  une  demeure  eternelle  au  ciel,  et  que  la  nostre  heritage  est  tout  asseure  par  foy,  encores  que  nous  ne  le  possedions  point  maintenant.  Que  non  seulement  il  nous  face  ceste  grace,  mais  a  tous  peuples  et  nations  de  la  terre  etc.