29:286  monia?  Atque  his  gradibus  nos  Dei  beneficia  decet  agnoscere  et  praedicare,  ut  ne  extra  nos  exeamus.  Si  Deus  mei  misertus  ex  ingenti  quopiam  periculo  me  eripuit,  equidem  merito  sum  hoc  praedicaturus,  verum  hoc  beneficio  ad  aliud  maius  quasi  manu  deducor,  ut  ita  Deum  rursus  compellem:  Mi  Deus!  quanta  tua  erga  me  beneficia,  quem  non  tantum  in  hac  vita  corporea  ut  filium  pater  foves,  sed  cuius  etiam  es  animae  misertus,  et  ex  inferorum  abyssis  erutam  in  libertatem  asseruisti.  Nam  quae  quantave  est  vitae  illius  coelestis  nobis  per  filium  partae  dignitas  et  excellentia,  quantum  decus  longe  ipsa  etiam  angelorum  gloria  et  maiestate  maius?  Neque  enim  angeli  ipsi  Dei  maiestati  intuendae  pares  sunt,  nisi  Domini  nostri  Iesu  Christi  merito  ac  beneficio.  Tu  me  tamen,  Domine  Deus,  in  haeredum  ac  filiorum  tuorum  numerum  adscribere  non  dedignaris.  Hic  est  igitur  usus  doctrinae  illius  quam  hoc  loco  discimus:  ut  Dei  singula  erga  nos  beneficia  sic  expendamus,  ut  debitas  ipsi  gratias  agamus,  et  eius  bonitatem,  virtutem,  potentiam  et  iustitiam  meritis  laudibus  efferamus.  Anna  igitur  in  hoc  cantico  magnifica  Dei  opera  sic  praedicat,  ut  de  accepto  a  Deo  filio  sibi  gratuletur:  Deoque  pro  tanto  beneficio  gratias  agat.  Porro  quod  hic  Anna  dicitur  oravisse,  Deique  gratiam  praedicavisse,  non  sic  intelligendum  quasi  precibus  aliquid  a  Deo  petierit:  (etsi  quidam  hanc  vocem  ad  superiores  Annae  preces  referant,  et  hac  una  voce  comprehendi  illas  velint)  sed  gratiarum  actionem  orationis  vocabulo  notari  dicendum.  Transeamus  ad  ipsius  cantici  verba:  Exsultavit,  inquit,  cor  meum  in  Domino  ete.  Duplicis  hic  laetitiae  mentio  est.  Nam  quum  exaltatum  cor  suum  dicit,  minime  dubitandum  quin  ad  Dei  singularem  favorem  respiciat,  quo  ad  preces  eius  annuerat.  Deinde  quum  iterum  se  laetatam  dicit,  ad  laetitiam  eam  qua  moeror  suus  ac  tristitia  fuerat  sublata.  Sed  obscuriora  haec  videbuntur  nisi  apertius  explicentur.  Quare  sciendum,  oportere  nos,  licet  multis  hinc  inde  angustiis  et  doloribus  velut  obrutos,  hilares  tamen  semper  esse.  Hanc  ob  causam  Philippenses  Paulus  iubet  in  Domino  semper  gaudere.  At  tunc  temporis  ecclesia  permultis  persequutionibus  agitabatur:  Paulus  in  vinculis  tenebatur,  miseri  fideles  instar  ovium  intra  luporum  fauces  versabantur,  iu  ipsis  ecclesiae  visceribus  multa  malorum  semina  fovebantur,  quibus  omnibus  fidelium  animus  ita  concuti  poterat  ut  penitus  deficeret.  Nam  animi  aegritudo  et  summa  tristitia  hominem  plane  deiiciunt  eidemque  stuporem  adferunt.  Idcirco  in  his  difficultatibus  gaudio  spirituali  superanda  tristitia  illa  est,  ut  quicunque  casus,  quaecunque  tandem  procellae  ac  tempestates  ingruerint,  saeviente  mundo  ac  Satana,  tamen  imperterriti  et  inconcussi  subsistamus.  Quare  etsi  multae