25:286  tum  populum  divinitus,  ut  irritae  sint  suae  divinationes,  et  vana  auguria.  Alterum  membrum  versus  simpliciter  mihi  videtur  huc  tendere,  Deum  praeclara  opera  exinde  editurum  pro  defensione  populi  sui,  quae  cum  admiratione  narrentur.  Coactum  est  et  a  sensu  remotum  quod  alii  vertunt:  Sicut  hoc  tempore  dicetur:  Quid  operatus  est  Deus  in  Israele?  potius  enim  dicere  vult  Balaam,  longos  fore  progressus  gratiae  Dei,  cuius  exordia  duntaxat  tunc  apparebant:  ac  in  summa  pronunciat  exinde  memorabiles  fore  Dei  virtutes  in  populo  illo,  quae  amplam  materiam  historiis  suppeditent.  24.  En  populus  tanquam  leo.  Haec  similitudo  non  omni  ex  parte  convenit.  Non  enim  saevos  aut  rapaces  fore  Israelitas  significat,  sed  validos  et  robustos:  et  si  quis  eos  lacessat  promptos  ad  resistendum.  Capite  proximo  iterum  recurret  verbis  paululum  mutatis.  Quod  autem  hic  generaliter  praedicat  Balaam  de  toto  populo,  in  benedictionibus  Iacob  confertur  in  solam  tribum  Iuda  quia  illic  maxime  excelluit  fortitudo.  Summa  est  quamvis  undique  impetatur  populus  Israel,  praeditum  fore  invicta  fortitudine,  quae  omnes  impetus  frangat,  vel  procul  abigat.  Caeterum  meminerimus  virtutem  hanc,  qua  se  tuebitur  Israel  contra  omnes  hostes,  numerari  inter  Dei  dona:  ac  si  diceret  Balaam,  Dei  praesidio  fore  salvum.  EX  EODEM  CAPITE.  25.  Dixit  autem  Balac  ad  Balaam:  Neque  maledicas  ei,  neque  benedicas.  26.  Cui  respondit  Balaam,  dicens:  Annon  dixi  tibi:  Quidquid  dixerit  mihi  Iehova  id  faciam?  27.  Tunc  dixit  Balac  ad  Balaam:  Veni  agedum,  ducam  te  ad  locum  alium,  si  forte  inde  placebit  Deo  ut  maledicas  ei  mihi.  28.  Sumpsit  ergo  Balac  ipsum  Balaam  in  verticem  Peor  qui  respicit  versus  desertum  1).  29.  Dixit  autem  Balaam  ad  Balac  :  Aedifica  mihi  hic  septem  altaria,  et  appara  mihi  hic  septem  iuvencos  et  septem  arietes.  30.  Fecit  itaque  Balac  quemadmodum  dixerat  Balaam,  et  obtulit  iuvencum  et  arietem  in  unoquoque  altari.  25.  Dixit  autem  Balac  ad  Balaam.  Hic  tanquam  in  speculo  cernere  licet  quam  misere  huc  et  illuc  agitentur  increduli,  ut  inter  vanas  spes  et  metus  alternent,  ut  sententiam  mutando  revolvantur  tamen  in  eosdem  errores:  ac  si  per  labyrinthum  eos  circumageret  caeca  intemperies.  Ubi  se  opinione  deceptum  videt  Balac,  cupit  saltem  conductitium  prophetam  nec  prodesse  nec  obesse.  Id  vero  perinde  est  ac  si  Deum  vellet  iacere  otiosum.  1)  In  margine:  vel,  Iesimon.