6:285  DE  LIBERO  ARBITRIO.  quasi  parta  victoria,  exsultat  Pighius.  Ego  autem  de  praesenti  nostro  statu  intelligenda  haec  verba  nego  :  sed  qualis  prima  sua  origine  factus  fuerit  homo  tantum  ostendere.  Disertis  verbis  explicat,  qualis  creatus  fuerit  homo:  corruptionem  quae  lapsum  consequuta  [pag.  73  J  est,  non  commemorat:  sed  tantum  quum  malitiae  causam  assignare  vult,  sic  loquitur  Unde  malus  homo?  ex  propria  ipsius  voluntate.  Unde  malus  diabolus?  ex  eadem  causa.  Nam  et  ipse  per  se  liberam  habet  vitam,  et  liberum  arbitrium  in  se  situm,  aut  manendi  cum  Deo,  aut  se  ab  eo  alienandi.  Quid  nunc  iudicandum  est?  An  ipsum  latebat,  quale  et  quantum  vulnus  naturae  nostrae  ex  peccato  inflictum  esset?  At  se  ipse  alibi  ab  hac  suspicione  liberat,  dum  humani  generis  miseriam  his  paucis  quidem,  sed  minime  tamen  obscuris  verbis  attingit:  Salutis  quidem  debiles,  liberationis  vero  indigent,  qui  in  captivitate  detinentur.  Qui  igitur  sub  morte  positus  est,  sciens  quod  unus  est  qui  liberat,  et  unus  qui  servat,  In  te,  inquit,  speravi.  Serva  me  a  debilitate,  libera  a  captivitate.  Qui  debilem  et  captivum  hominem  facit,  et  eo  quidem  servitutis  genere  detineri  pronunciat,  unde  a  solo  Deo,  non  a  se  ipso  liberetur,  quantum  de  priore  illa  conditione  detrahit?  Sed  in  hac  quoque  captivitate  libero  arbitrio  multum  concedit.  Audiamus  quantum  illud  sit.  Qui  in  verbo  Dei  eruditi  non  sunt,  hi  frustra  inflati  per  liberum  arbitrium  peccati  insultus  abolere  se  posse  confidunt,  quum  per  solum  crucis  mysterium  peccatum  aboleatur.  Nam  quod  in  hominis  potestate  situm  est  liberum  arbitrium,  in  eligendo,  aut  non  eligendo,  ut  diabolo  resistat,  situm  est,  non  in  eo,  quod  possit  robur  habere  contra  affectus.  Et  paulo  post:  Nisi  enim  per  potentius  auxilium  ab  ignitis  adversarii  iaculis  liberati,  recepti  fuerimus  in  adoptionem,  frustra  omnia  molimur,  velut  procul  a  potentia  crucis.  Si  diligenter  omnia  expendas,  non  aliud  homini  relinquit,  quam  in  eligendo  iudicium,  quod  et  penitus  sit  inefficax,  et  ad  vincendas  cupiditates  nihil  per  se  valeat.  Tametsi  autem  non  omnia,  quae  dicenda  fuerant,  hic  dicit,  quantum  tamen  a  magnifica  illa  libertatis  praedicatione  declinet,  videre  licet.  In  altero  loco  nihil  animadverto,  quod  nobis  vel  minimum  adversetur,  [pag.  74]  Partem  animae  rationalem  potestatis  nostrae  esse  docet.  Terum  ut  ego  taceam,  satis  perspicuum  est  illic  animae  naturam  in  sua  integritate  considerari:  sicut  in  definitionibus  dandis  fieri  solet.  Nos  quoque,  quum  de  anima  disputatio  est,  primum  eius  partes  in  medium  statuimus,  mentem  ac  voluntatem,  et  mentib  quidem  officium  esse  docemus,  praeire  voluntati,  eamque  gubernare:  unde  et  nomen  habet  ἡγεμονικὸν:  voluntatem  porro  tunc  bene  habere  dicimus,  quum  se  cupiditatibus  huc  illuc  distrahendam  non  exponit,  sed  mentis  imperium  auscultat:  totum