41:285  285  IN  DANIELEM.  CAP.  XII.  286  tranquillum  imperium  Romanis,  et  tamen  non  fuisse  ullam  imperii  sedem,  quia  proconsules  quasi  peregrini  apud  hospites  suos  degebant.  Tandem  adiungit  venturos  ad  montem  desiderii  sanctitatis.  Haec,  ut  nuper  dixi,  prophetiae  huius  edendae  causa  fuit,  ne  novitas  ipsa  concuteret  animos  piorum,  quum  viderent  barbaram  gentem,  et  procul  ante  remotam  esse  impositam  suis  cervicibus,  et  non  minus  superbe  et  contumeliose,  quam  crudeliter  dominari.  Quum  ergo  tam  triste  spectaculum  obiectum  esset  piorum  oculis,  oportuit  non  vulgari  modo  confirmari,  ne  prorsus  succumberent.  Ergo  praedicit  angelus  quid  futurum  sit,  ut  agnoscant  re  ipsa  nihil  sibi  fortuito  accidere:  deinde  ut  sciant  divinitus  gubernari  illos  quantumvis  turbulentos  motus.  Sequitur  consolatio,  venturos  tandem  ad  finem  suum,  et  neminem  illis  fore  auxilio.  Hoc  non  statim  impletum  fuit.  Nam  postquam  Crassus  templum  spoliavit,  quamvis  adverso  proelio  conflixerit  contra  Parthos,  non  tamen  ideo  cesserunt  Romani,  sed  magis  ac  magis  floruit  ipsorum  monarchia  sub  Augusto.  Tandem  scimus  urbem  a  Tito  fuisse  excisam,  et  tunc  fere  ad  internecionem  usque  exstinctum  fuit  nomen  iudaici  populi.  Sed  postea  scimus  quam  foeda  dissipatio  sequuta  sit.  Romani  enim  deiecti  sunt  a  toto  Oriente:  coacti  sunt  saepius  pacisci  nunc  cum  Parthis,  nunc  cum  Persis,  nunc  cum  aliis  gentibus:  tandem  ablatum  illis  fuit  imperium.  Et  si  quis  centum  annorum  historiam  expendat,  reperiet  nunquam  de  ulla  gente  tam  atroces  poenas  fuisse  sumptas,  quam  de  Romanis,  nec  maiore  probro  ullam  monarchiam  fuisse  eversam.  Deus  enim  incubuit  in  gentem  illam  toto  furore,  ut  esset  quasi  spectaculum  toti  mundo.  Ergo  non  frustra  dicit  angelus  venturum  tandem  illis  suum  finem.  Postquam  ergo  omnia  populati  fuerint,  et  vastaverint,  postquam  illis  penetrabiles  atque  adeo  apertae  fuerint  omnes  terrae,  postquam  illis  obviam  prodierint  omnes  populi  ut  se  dedant,  tandem  Romanos  ipsos  perditum  iri  et  exstinctum.  Nemo  ergo  erit  illis  auxiliator.  Non  dubium  est  quin  hoc  vaticinium  extendatur  ad  evangelii  promulgationem.  Etsi  autem  saeculo  uno,  vel  circiter,  ante  illud  tempus  Christus  natus  erat,  tamen  tunc  vere  mundo  illuxit,  quum  innotuit  per  evangelium.  Angelus  ergo  ad  hunc  usque  articulum  temporis  prosequutus  est  vaticinium  suum.  Iam  subiungit,  CAPUT  XII.  1.  Et  tempore  illo  stabit  Michael  princeps  magnus,  stans  pro  filiis  populi  tui,  et  erit  tempus  afflictionis,  quale  non  fuit  ab  esse  gentem  (hoc  est,  ex  quo  coeperunt  esse  gentes)  ad  tempus  illud  usque:  et  tempore