25:285  285  REDITUS  AD  HISTORIAM.  286  vel  affligi.  Ac  si  dictum  esset:  Si  quis  iniuste  nocere  velit  huic  populo,  Deus  nullam  vim  nec  iniuriam  admittet,  sed  potius  se  opponet  instar  clypei.  Atqui  si  placeat  hic  sensus,  malim  verba  indefinite  accipere:  ac  si  dictum  esset  Non  videbitur  molestia  in  Iacob.  Nam  Hebraei  saepe  ubi  verbum  sine  subiecto  ponunt,  generaliter  ad  quoslibet  extendunt  rem  ipsam  de  qua  agitur:  et  tunc  verba  activa  commode  in  passiva  resolvi  possunt.  Atque  ita  melius  fluet  contextus,  quia  subiicitur  continuo  post,  Iehova  Deus  eius  est  cum  eo:  ubi  reddi  causa  videtur  cur  non  conspicienda  sit  molestia  adversus  Iacob:  quia  scilicet  aderit  Deus  ad  ferendum  auxilium.  Scimus  autem  immensam  eius  potentiam  sufficere  ad  tuendam  ecclesiae  salutem,  ut  ne  portae  quidem  inferorum  praevaleant.  Quod  postea  sequitur:  Clangorem,  vel  iubilationem  regis  in  eo  esse,  intelligo,  Deum  semper  triumphandi  materiam  daturum  esse.  Nomen  enim  quod  alibi  vetus  interpres  iubilationem  vertit  videtur  hic  sumi  pro  gratulatoriis  canticis.  Sed  quia  tubae  clangorem  significat,  non  male  quadrabit,  populum  fore  terribilem  suis  hostibus  quia  audacter  prosiliet  ac  descendet  in  proelium,  quasi  Deo  tuba  clangente.  22.  Deus  eduxit.  Causam  perpetuae  felicitatis  indicat,  quia  Deus  qui  populum  illum  semel  redemit,  inceptum  a  se  opus  non  deseret.  Argumentum  a  continua  beneficiorum  Dei  serie  ductum,  nam  quia  ex  fonte  inexhausto  manant,  perennem  habent  cursum.  Hoc  autem  ad  ecclesiae  statum  specialiter  pertinet:  quia  donec  filios  suos  Deus  ad  metam  usque  perduxerit,  nunquam  desinit  erga  eos  esse  beneficus.  Merito  igitur  colligit  Balaam,  quia  Deus  semel  populum  redemit,  perpetuum  fore  salutis  praesidem.  Postea  docet  potentiam  Dei  qua  populum  tuebitur,  fore  invictam.  Hoc  enim  sibi  vult  similitudo  unicornis.  23.  Non  est  augurium.  Vulgo  intelligunt  laudari  populum,  quia  auguriis  et  magicis  superstitionibus  non  sit  deditus,  quemadmodum  etiam  Deus  lege  sua  severe  praeceperat  ne  se  polluerent  talibus  corruptelis.  Alii  sic  exponunt:  Non  indigent  Israelitae  ariolis:  quia  per  Urim  et  Thummim,  vel  per  prophetas,  illis  divinitus  reveletur  quidquid  est  utile.  Rectior  eorum  sententia  qui  sic  interpretantur:  Nullum  augurium  et  nulla  divinatio  valet  contra  Israelitas,  modo  clarior  accedat  explicatio.  Fatetur  enim,  meo  iudicio,  Balaam  suis  auguriis  non  esse  locum,  vel  solitas  suas  artes  nunc  cessare,  quoniam  earum  effectus  et  vigor  ad  Israelitas  non  perveniat.  Atque  haec  confessio  respondet  verbis  magorum  Pharaonis,  quum  dicerent:  Digitus  Dei  est,  postquam  pertinaciter  contenderant  eousque  dum  ipsos  cogeret  Deus  ad  cedendum.  Ita  nunc  Balaam  pronunciat  protegi  elec-