10.1:285  PRO  FALLESIO.  quam  deiectus  fuerim,  quum  integra  esset  vis  morbi.  Nec  certe  existimo,  voluisse  te,  Caesar,  ut  certo  nihilominus  vitae  meae  periculo  discederem  Argentorato.  Quinimo  mihi  persuasi,  aequo  te  animo  tulisse,  quod  hic  haererem  in  loco,  cui  me  morbus  ita  affixerat,  ut  me  nullo  modo  dare  in  viam  possem.  Saltem  illud  certum  et  perspicuum  est,  nulla  me  vel  contemptione  vel  rebellione  laesisse  tuam  maiestatem:  quemadmodum  tamen  curia  tua  Machliniensis  statuit,  quia  hinc  abscedere  differrem,  me  contumaciae  esse  damnandum.  Certe  ubi  facultas  deest,  de  voluntate  iudicari  non  potest.  Constat  autem  ab  eo  tempore,  non  potuisse  me,  nisi  magno  meo  malo,  ne  domo  quidem  mea  pedem  movere.  Superest  tertium  de  illa  quam  imperaras  purgatione  caput:  quod  et  praecipuum  est  (ex  eo  enim  omnia  reliqua  dependent)  et  postrema  pars  erit  huiusce  meae  defensionis.  Quod  ad  superiora  illa  crimina,  quorum  obiter  hactenus  mentionem  feci,  non  omnino  coram  te,  Caesar,  obiiciuntur.  Et  certe  vaniora  [pag.  30]  sunt,  quam  ut  speret  quisquam  iis  te  fidem  habiturum.  Sed  quae  tuam  maiestatem  adversum  me  irritare  potuit,  una  est  offensa:  quod  male  suspiceris  de  mea  religione.  Porro  non  ignoras,  Caesar,  me  per  eundem  illum  virum,  quem  miseras,  hac  quoque  in  re  satisfacere  tibi  conatum.  Misi  enim  quandam  brevem  meae  fidei  confessionem,  in  qua  nihil  astute  finxi:  sed  quod  animo  inclusum  habebam,  ore  sum  confessus.  Neque  tamen  pluribus  verbis  explicui  singula  capita,  quia  nec  id  opus  fore  putabam.  Sed  nihil  illa  continet,  quod  cum  vera  doctrina  christiana  plane  non  consentiat:  ut  testis  mihi  esse  possit,  illud  mihi  cordi  et  curae  esse,  ut  Deum  pura  simplicitate  iuxta  eius  verbum  colam.  Atqui  curia  tua  Machliniensis,  Caesar,  eo  nomine  pronunciavit,  descivisse  me  a  fide  christiana.  Equidem  non  ea  stulta  ambitione  ducor,  ut  literatus  videri  affectem.  Sed  non  possum  tamen  non  mirari,  quid  tandem  in  illa  mea  confessione,  quod  ita  damnaret,  legerit.  Nihil  enim  continet,  quod  non  omnes  et  prophetae,  et  apostoli,  et  martyres  semper  confessi  sint.  Nisi  si  forte  illud  non  ferat,  quod  errores  eos  non  amplectar,  quos  omnino  reiicere  cogor,  siquidem  Deo  reclamare  nolim.  At  quae  tandem  haec  [pag.  31]  causa,  cur  ita  graviter  damnent  repudientque  doctrinam,  quae  mihi  cum  omnibus  piis,  et  universa  Dei  ecclesia  communis  est?  Quod  ad  te  attinet,  Caesar,  equidem  spero  aequiore  animo  acceptam  esse.  Sed  quia  non  omnino  hic  certus  esse  possum,  hicque  mihi  statutum  est,  omnes  causae  meae  partes  sine  ulla  dissimulatione  exponere:  nec  debeo,  nec  possum,  summum  hoc  praecipuumque  caput  omittere.  Illud  vero  a  te,  Caesar,  supplex  peto,  ut  quum  nihil  hic  agam  malitiose,  nihil  arroganter,  nihil  hypocritice:  dicentem  me  ferat  et  audiat  tua  maiestas,  donec  breviter  explicuero,