1:285  CAP.  I.  DE  COGNITIONE  DEI.  A4;  B4;  C  4.]  reformidant.  Itaque  ne  ubique  videantur  maiestatis  eius  contemptores,  qualicunque  religionis  specie  defunguntur;  interim  tamen  non  desinunt  omni  vitiorum  genere  se  conspurcare  et  flagitia  flagitiis  copulare,  donec  sanctam  Domini  legem  omni  ex  parte  violarint,  et  universam  eius  iustitiam  dissiparint;  vel  certe  non  ita  retinentur  simulato  illo  Dei  timore,  quin  suaviter  in  peccatis  suis  acquiescant,  et  sibi  blandiantur,  et  carnis  suae  intemperantiae  indulgere  malint,  quam  spiritus  sancti  fraeno  eam  cohibere.  Sed  quando  inanis  ea  est  et  mendax  religionis  umbra,  vix  etiam  digna  quae  umbra  nominetur,  paucis  expediendum  est  qualis  sit  illa  singularis,  quae  solis  fidelium  pectoribus  instillatur,  Dei  notitia;  qualis  etiam,  qui  inde  consequitur,  pietatis  affectus.  9.  Initio  pia  mens  Deum  non  quemlibet  sibi  somniat,  sed  unicum  et  verum  duntaxat  intuetur;  neque  illi  quodcunque  visum  fuerit  affingit,  sed  talem  habere  contenta  est,  qualem  se  manifestat:  summa  diligentia  semper  cavens,  ne  audaci  temeritate  extra  eius  voluntatem  egrediatur.  Ita  cognitum,  quia  sua  providentia  cuncta  moderari  intelligit,  tutorem  sibi  esse  confidit,  et  protectorem,  ideoque  in  fidem  eius  se  confert.  Quia  intelligit  esse  cuiusvis  boni  sibi  autorem,  si  quid  deest,  si  quid  premit,  mox  se  recipit  in  eius  praesidium,  et  invocato  eius  nomine,  exspectat  dum  opem  ferat.  Quia  bonum  esse  ac  benignum  persuasa  est,  in  eius  clementiam  certa  fiducia  recumbit;  nec  dubitat,  quin  habitura  sit  semper  in  eius  misericordia  paratum  omnibus  suis  malis  remedium.  Quia  dominum  ac  patrem  agnoscit,  dignum  esse  iudicat,  cuius  imperium  in  omnibus  intueatur,  maiestatem  suspiciat,  gloriam  promovendam  curet,  voluntati  obsequatur.  Quia  iustum  esse  iudicem  videt,  qui  sit  in  transgressores  omnes  severe  vindicaturus,  eius  tribunal  semper  in  conspectu  sibi  proponit,  quo  ab  iis  omnibus  retrahatur,  quibus  ira  eius  provocari  potest.  Neque  tamen  iudicii  eius  cogitatione  sic  terretur,  ut  subducere  se  velit,  etiam  si  quod  pateat  effugium:  quin  illum  non  minus  libenter  amplectitur  malorum  ultorem,  quam  remuneratorem  bonorum;  quando  ad  eius  gloriam  pertinere  non  minus  intelligit,  apud  eum  impiis  et  flagitiosis  repositam  esse  poenam,  quam  fidelibus  vitae  aeternae  mercedem.  Praeterea  non  sola  ultionis  formidine  coercetur,  ne  peccet:  sed  quia  Deum  loco  patris  amat  et  reveretur,  loco  domini  honorat,  etiam  si  nulli  essent  inferi,  solam  tamen  eius  offensionem  horret.  En  quid  sit  pura  germanaque  religio  :  nempe  fides,  cum  serio  Dei  timore  coniuncta.  Ut  sub  timoris  nomine,  tum  sincera  eius,  quae  per  legem  praescribitur,  iustitiae  dilectio,  tum  voluntaria  divinae  maiestatis  reverentia  comprehendatur.  10.  Ergo  si  ea  conditione  nati  sumus  omnes,