9:284  Nam  tuae  rationes  sunt  obscurae,  et  fere  eiusmodi,  ut  statim  deposito  de  manu  libro  excidant  ex  memoria,  neque  adversarios  convincant.  At  adversariorum  argumenta  sunt  aperta,  acria,  et  quae  facile  memoriae  mandentur,  et  ab  illiteratis  (quales  fere  erant  qui  Christum  sectabantur)percipiantur.  Hinc  fit  ut  tui  discipuli  fere  magis  autoritate  tua  nitantur,  quam  ratione.  Et  quum  adversarios  vincere  non  possunt,  habent  eos  pro  haereticis  et  pertinacibus,  et  ab  eorum  consortio  abstinent,  et  omnes  ubique  monent  ut  abstineant.  Ego  vero,  qui  non,  quis  dicat,  sed  quid  dicatur,  attendendum  censeo,  omnes  audiendos,  omniaque  probanda  iudico,  et  quod  bonum  est  tenendum.  Quare,  Calvine,  si  qua  vera,  aperta,  firmaque  argumenta  habes,  quibus  refelli  possint  adversarii,  quaeso  te  ut  ea  in  medium  adferas,  quo  veritati  patrocineris.  Scis  quod  scriptum  sit:  Dabitur  vobis  os  et  sapientia,  cui  resistere  nemo  poterit  (Luc.  21,  15).  Ego  ubicunque  veritatem  deprehendere  potero,  paratus  sum  sequi,  et  alios  ad  eandem  adhortari.  Sin  forte  errasti  (homines  enim  sumus)  quaeso  te,  Calvine,  ut  Deo  gloriam  tribuas.  Erit  id  tibi  gloriosius,  quam  in  errore  perseverare.  Mihi  vero  ne  ob  hanc  epistolam  succenseas,  si  iustus  et  verax  es,  non  videtur  metuendum.  Primum  quia  e  re  tua  est  de  iis  admoneri:  deinde  quia  si  sentis  (ut  dicis)  omnia  necessario  fieri,  credes  hanc  quoque  epistolam  a  me  scriptam  necessario.  Vale.