41:284  Tandem  concludit  angelus,  Romanis  fore  pacatum  imperium  in  Asia  maiore,  et  in  illis  plagis  orientalibus:  in  Syria,  in  Iudaea,  et  usque  in  Persidem.  Iam  ostendimus  nihil  hic  praedici,  quod  non  referant  profanae  historiae,  et  quod  non  sit  satis  cognitum  omnibus  qui  mediocriter  exercitati  sunt  in  cognitione  illorum  temporum.  Notandum  vero  est  quod  dicit  regem  romanum  fixurum  tentoria  palatii  sui.  Significat  enim  hac  loquutione  non  tantum  Romanos  bellum  gesturos  in  Oriente,  sed  fore  totius  illius  plagae  dominos.  Nam  dixisset  fixuros  sua  tentoria,  ut  solent  qui  bellum  gerunt  et  contentus  fuisset  communi  loquendi  more,  sed  nomen  palatii  crebris  migrationibus  opponit,  atque  ita  significat  non  metaturos  castra  militari  more  tantum,  sed  stationem  diuturnam  fore.  Cur  autem  de  tentoriis  loquitur?  Nempe  quia  non  erit  illic  imperii  sedes.  Nam  sibi  sedulo  cavebant,  ne  plus  dignitatis  tribuerent  ulli  loco,  quam  erat  ipsis  utile.  Ergo  sic  proconsules  trahebant  secum  magnos  comitatus,  ut  tamen  nullum  illis  esset  certum  palatium  :  habebant  sua  tentoria,  sed  saepe  habitabant  in  hospitiis,  qualia  tunc  erant  hospitia.  Sic  ergo  aptissime  hic  loquitur  angelus  quum  dicit  Romanos  fixuros  tentoria  palatii,  quia  scilicet  domito  Oriente,  illic  tranquille  regnarunt:  et  tamen  nulla  fuit  certa  sedes,  quia  nolebant  ullum  locum  sic  excellere  ut  esset  rebellandi  occasio.  Quod  dicit  Inter  maria,  quidam  putant  notari  mare  mortuum,  et  lacum  Asphaltiten,  et  opponi  mari  mediterraneo.  Sed  non  dubito  quin  mare  Persicum  intelligat  angelus.  Neque  enim  dicit  Romanos  fore  dominos  omnium  terrarum  quae  interiacent  inter  duo  maria,  sed  tantum  dicit  fixuros  tentoria  palatii  inter  maria.  Hoc  autem  scimus  factum  esse,  quum  a  Ponto  Euxino  dominati  sunt  usque  in  Persidem.  Scimus  quam  late  patuerit  regnum  Mithridatis.  Nam  historici  commemorant  viginti  duas  gentes,  quas  habuit  sub  ditione  sua.  Postea  ab  una  parte  stabat  Asia  minor,  quae  constabat  multis  gentibus,  ut  alibi  dictum  fuit.  Armenia  illis  cessit  post  devictum  Tigranem.  Cilicia  fuit  una  provincia  duntaxat,  imo  pars  provinciae,  quae  tamen  fuit  amplissima  et  ditissima  regio.  Habuit  quidem  multa  deserta  et  multos  montes  saxosos  et  incultos:  sed  erant  etiam  in  Cilicia  multae  urbes  opulentae,  nec  tamen  effecit  integram  provinciam,  fuit  Syria,  fuit  Iudaea:  denique  non  mirum  est  quum  dicit  angelus  inter  maria  Romanos  fixuros  tentoria  sua.  Nam  habitabant  ultra  mare  Mediterraneum.  Primus  illis  traiectus  fuit  in  Siciliam,  deinde  in  Hispanias:  tertio  coeperunt  extendere  manus  suas  in  Graeciam,  deinde  in  Asiam  maiorem  adversus  Antiochum:  postea  occuparunt  totum  Orientem.  Nam  ab  uno  litore  erat  Asia  minor  et  multae  gentes:  deinde  ab  altero  erat  mare  syriacum  et  iudaicum  usque  ad  mare  aegyptiacum.  Inter  maria  igitur  videmus  fuisse