29:284  Dei  facie:  mactato  iuvenco  ex  voto.  Quod  de  adoratione  coram  Dei  facie  dicitur,  ostendit  sacrificia  fuisse  tantum  appendices  cultus  qui  Deo  est  exhibendus.  Et  vox  adorationis  quae  additur  ritum  precandi  Deum  apud  Iudaeos  ostendit,  qui  proni  in  terram  Deum  adorabant.  Ergo  Anna  in  genua  supplex  Deo  facta  procubuit.  Verum  quidem  est,  cultum  Dei  esse  spiritualem:  sed  nihilominus  Deum  corporibus  non  minus  quam  animabus  venerari  fideles  decet.  Ac  sane  vix  ad  Deum  accedimus  supplicandum  quin  lingua  manusque  simul  etiam  moveantur,  et  cum  anima  communicent.  Apage  ergo  fanaticos  illos,  qui  magnos  e  pectore  gemitus  edere  se  simulant,  et  supra  nubes  ipsas  efferri,  et  tamen  manuum  elevationem  non  necessariam  ad  preces  contendunt.  Nae  stultitiam  suam  produnt.  Nam  si  quid  in  ipsis  inesset  fidei,  certum  est  eosdem  affectum  adorandi  Deum  etiam  coram  hominibus  palam  testatum  facturos.  Quare  divini  contemptus  species  quaedam  est,  haec  adminicula  tanquam  rudimenta  pueris  convenientia  reiicere.  Nos  observemus:  Dei  adorationem,  esse  publicam  fidelium  professionem,  qua  sese  Deo  subiici  et  omnia  illi  accepta  ferre  testantur,  cuius  rei  sacrificia  fuerunt  tesserae  et  confirmatio.  Praesentia  vero  Dei  vel  eius  facies  nulla  est  alia  intelligenda,  quam  virtus  Dei  ac  specialis  gratia,  quam'  hoc  vel  illo  loco  patefacit:  veluti  quum  legem  suam  arca  voluit  includi,  quum  arcae  propitiatorium  addidit,  ibique  se  praesentem  fore  pollicitus  est  quaerentibus  ipsum,  ut  saepe  scriptura  loquitur,  minime  cogitandum  est,  illis  rebus  Dominum  fuisse  conclusum:  sed  ita  nobiscum  scripturam  balbutire:  Deumque  sese  ad  sui  populi  captum  accommodasse,  ne  alienos  sibi  Deos  quaereret  suam  praesentiam  in  arca  sua  privatim,  ut  ita  dicam,  alligasse,  nempe  quoniam  terreni  sumus:  Deus  infirmitatem  nostram  ita  sublevat:  ideoque  has  caeremonias  et  cultum  ad  arcam  suam  instituit.  Nos  vero  coram  maiestate  Dei  facti  supplices,  infinita  peccata,  quibus  eius  in  nos  iram  provocare  non  desinimus,  agnoscentes  precemur  eum  ut  maiores  indies  progressus  in  verbi  sui  auditione  faciamus,  nosque  ita  ipsi  dedicemus,  eiusque  cultui  studeamus,  ut  vere  in  ipsius  populo  censeamur:  atque  vicissim  nos  ita  tutetur  ipse  ac  protegat,  ne  unquam  pereamus,  quandoquidem  nos  sibi  in  populum  peculiarem  tanto  pretio  asseruit.  Sic  vota  nostra  dirigat  ut  sine  fuco  et  simulatione  nominis  eius  propagationi  et  gloriae  studeamus:  nos  ab  omnibus  huius  saeculi  immunditiis  expurgatos  iustitia  sua  vestiat,  ut  sanctimoniam  sic  in  dies  excolentes  ad  ipsum  propius  pedetentim  accedamus,  donec  in  summam  illam  et  aeternam  perfectionem  recipiamur.  Amen.