1:284  [A4;  B3;  C  3.  ipsum  adeo  corruptum,  ut  nonnisi  pessimos  fructus  producat.  7.  Atque  hic  bifariam  praecipue  peccatur.  Primum,  quod  miseri  homines,  in  vestiganda  Dei  veritate,  non  supra  se  ipsos,  ut  par  erat,  conscendunt,  sed  ipsum  carnalis  sui  stuporis  modo  metiuntur;  nec  qualem  se  cognoscendum  exhibet  apprehendunt,  sed  qualem  pro  sua  temeritate  fabricati  sunt  imaginantur.  Quo  gurgite  aperto,  quaquaversum  pedem  moveant,  in  exitium  semper  praecipites  ruant  necesse  est.  Quidquid  enim  postea  in  cultum  aut  obsequium  Dei  moliantur,  impensum  ei  ferre  nequeunt:  quia  non  ipsum,  sed  cordis  sui  figmentum  potius  et  somnium  pro  ipso  colunt.  Sic  inane  illud  patrocinium,  quod  superstitioni  suae  praetexere  multi  solent,  evertitur.  Putant  enim  studium  qualecunque  religionis  quamlibet  praeposterum,  satis  esse;  sed  non  animadvertunt,  veram  religionem  ad  Dei  nutum,  ceu  ad  perpetuam  regulam,  debere  conformari;  Deum  vero  ipsum  semper  sui  similem  manere;  non  spectrum  esse  aut  phantasma,  quod  pro  uniuscuiusque  libidine  transformetur.  Et  sane  videre  est,  quam  mendacibus  fucis  Deo  illudat  superstitio,  dum  gratificari  tentat.  Nam  ea  fere  sola,  quae  sibi  curae  non  esse  testatus  est,  arripiens,  quae  praescribit  ac  sibi  placere  docet  aut  contemptim  habet,  aut  etiam  non  dissimulanter  reiicit.  Sua  ergo  deliramenta  colunt  et  adorant,  quicunque  cultus  Deo  commentitios  erigunt;  quia  nequaquam  ita  cum  Deo  nugari  auderent,  nisi  Deum  prius  suis  nugamentis  consentaneum  finxissent.  Quare  apostolus  vagam  illam  et  erraticam  de  numine  opinionem,  Dei  esse  ignorantiam  pronuntiat  (Gal.  4,  8).  Quum  Deum,  inquit,  nesciretis,  serviebatis  iis,  qui  natura  dii  non  erant.  Et  alibi  (Eph.  2,  12),  sine  Deo  fuisse  tradit  Ephesios,  quo  tempore  a  recta  unius  Dei  cognitione  aberrabant.  Nec  multum  interest,  hac  saltem  in  parte,  Deumne  unum,  an  plures  concipias:  quia  semper  a  vero  Deo  discedis  et  deficis;  quo  relicto  nihil  tibi  restat,  nisi  exsecrabile  idolum.  Superest  ergo,  ut  cum  Lactantio  constituamus,  nullam  esse  legitimam  religionem,  nisi  cum  veritate  coniunctam.  8.  Secundum  peccatum  est,  quod  ad  habendam  Dei  rationem  inviti  et  renitentes  pertrahuntur,  nec  eo  imbuuntur  timore,  qui  ex  reverentia  maiestatis  eius  procedat,  sed  ex  metu  iudicii  eius;  quod  quia  effugere  nequeunt,  exhorrent:  sic  tamen,  ut  etiam  abominentur.  Siquidem  convenienter  in  impietatem,  atque  in  hanc  solam,  competit  illud  Statii,  timorem  primum  fecisse  in  orbe  deos.  Qui  animum  a  Dei  iustitia  alienum  gerunt,  tribunal,  quod  ad  vindicandas  eius  transgressiones  stare  sciunt,  eversum  magnopere  cupiunt.  Quo  affectu  adversus  Dominum  belligerantur,  qui  sine  iudicio  esse  non  potest;  sed  dum  eius  potentiam  sibi  inevitabilem  imminere  intelligunt,  quia  nec  amoliri,  nec  effugere  valent,