41:283  283  PRAELECTIONES  284  idque  in  gressibus  suis.  Hac  voce  clarius  explicat  quod  prius  diximus  de  similitudine  diluvii.  Dicit  igitur  terras  omnes  illis  expositas  fore,  quantumvis  munitae  fuerint  urbes,  quae  illos  tegerent  quasi  multis  claustris  oppositis,  ac  proinde  fore  illis  apertam  viam,  quia  nemo  impediet  quominus  perrumpant  per  totum  Orientem,  et  simul  etiam  subigant  et  urbes  et  pagos,  et  oppida,  quod  etiam  scimus  eventu  fuisse  completum.  Ergo  in  hoc  toto  contextu  videmus  nihil  coactum  esse,  sed  optime  quadrare  historiam  cum  vaticinio.  Postea  adiungit,  44.  Rumores  vero  (auditus  ad  verbum,  hoc  est,  qui  audientur)  terrebunt  eum  ab  oriente,  et  ab  aquilone,  egredieturque  eum  ira  magna,  ut  perdat  et  internecione  deleat  multos.  Hic  videtur  angelus  diversum  aliquid  tradere,  quod  scilicet  Romanis  non  ita  feliciter  succedet,  quin  quasi  subsistant  in  medio  cursu  victoriarum.  Dicit  enim  ipsos  territum  iri  rumoribus:  sed  bene  omnia  conveniunt,  quia  etsi  Romani  domuerint  quasi  nullo  negotio  et  intra  paucos  annos  totum  Orientem,  scimus  tamen  postea  fuisse  illis  res  adversas.  Nam  Crassus  spoliato  templo  misere  periit,  et  secum  perdidit  quasi  Romani  imperii  florem:  victus  est  ad  Carras  ingenti  proelio,  non  procul  Babylone,  proditus  scilicet  ab  exploratore  cui  nimium  fidebat.  Postea  iterum  Antonius,  quum  partiti  essent  orbem  terrarum  in  tres  partes,  ipse  et  Octavius,  et  Lepidus,  iterum  misere  afflictus  fuit  in  eodem  fere  loco  adversus  Parthos.  Non  mirum  igitur  est  quod  dicit  angelus  territum  iri  ab  oriente  et  a  septentrione  Romanos,  sicut  re  ipsa  etiam  contigit.  Sed  tamen  dicit  venturos  in  magna  iracundia,  quasi  diceret,  etiamsi  multas  copias  amittant,  etiamsi  graves  sint  illae  clades,  non  tamen  ideo  deficient  animis.  Scimus  enim  semper  in  rebus  desperatis  ipsos  quasi  apros  vel  truculentas  bestias  fuisse  concitatos  furore,  ut  in  mortem  ipsam  ruerent.  Et  hoc  etiam  factum  est  praesertim  Augusto  dominante.  Nam  ille  feliciter  aliquanto  pugnavit  cum  Parthis,  et  coegit  ipsos  ad  deditionem,  imposuit  conditiones  quasi  victor,  et  coegit  etiam  aquilas  referre,  quoniam  haec  erat  maxima  ignominia,  quod  translatae  erant  aquilae  in  Persidem.  Coegit  igitur  ipsos  referre  aquilas,  et  ita  abolevit  dedecus,  quod  contractum  fuerat  ab  Antonio.  Videmus  ergo  etiam  optime  fluere  contextum,  quod  scilicet  venient  Romani  cum  magna  iracundia  ad  perdendos  multos,  quamvis  putabunt  Parthi  se  tranquillos  fore  multis  saeculis,  neque  unquam  ausuros  esse  Romanos  quidquam  tentare  vel  aggredi.  Nunc  sequitur,  45.  Et  figet  tabernacula  palatii  sui  inter  maria  ad  montem  desiderii  sanctitatis,  et  veniet  ad  finem  suum,  et  non  auxiliator  ei.