1:283  INSTITUTIO  REL.  CHRIST.  1539  .  1554.  quod  nescire  cupiunt,  subinde  sentiscunt.  Nemo  in  audaciorem  aut  effraenatiorem  numinis  contemptum  prorupisse  legitur,  quam  C.  Caligula;  nemo  tamen  miserius  trepidavit,  quum  aliquod  irae  divinae  indicium  se  proferebat:  ita  Deum,  quem  studebat  ex  professo  contemnere,  invitus  exhorrescebat.  Hoc  passim  eius  quoque  similibus  evenire  videas:  ut  enim  quisque  est  audacissimus  Dei  contemptor,  ita  vel  ad  folii  cadentis  strepitum  maxime  perturbatur.  Unde  id,  nisi  ex  divinae  maiestatis  ultione?  quae  illorum  conscientias  eo  vehementius  percellit,  quo  magis  eam  refugere  conantur?  Omnes  quidem  latebras  respectant,  quibus  se  abdant  a  Domini  praesentia,  et  eam  rursum  ex  animo  suo  deleant:  sed  velint  nolint,  irretiti  semper  tenentur;  utcunque  interdum  videatur  evanescere  ad  momentum  aliquod,  subinde  tamen  recurrit,  et  novo  impetu  irruit.  Ut  si  qua  illis  remissio  est  a  conscientiae  anxietate,  non  multum  absimilis  sit  a  somno  ebriosorum  aut  phreneticorum,  qui  ne  dormientes  quidem  placide  conquiescunt:  quia  diris  et  horrificis  insomniis  continenter  sollicitantur.  Ergo  impii  quoque  ipsi  exemplo  sunt,  vigere  semper  in  omnium  hominum  animis  aliquam  Dei  agnitionem.  6.  In  hoc  valere  oportere  Dei  notitiam,  iam  attigimus:  primum  ut  ad  timorem  ac  reverentiam  nos  instituat,  deinde  ut  omne  bonum,  et  ab  illo  petendum,  et  illi  acceptum  esse  ferendum,  doceat.  Quomodo  enim  mentem  tuam  subire  queat  Dei  cogitatio,  quin  simul  extemplo  cogites,  te,  quum  figmentum  illius  sis,  imperio  illius  esse,  ipso  creationis  iure,  addictum  et  mancipatum?  vitam  tuam  illi  deberi?  quidquid  instituis,  quidquid  agis,  ad  illum  referri  oportere?  Id  si  est,  iam  profecto  sequitur,  vitam  tuam  prave  corrumpi,  nisi  ad  obsequium  sanctae  eius  voluntatis  componatur.  Rursum,  nec  ad  liquidum  perspicere  ipsum  potes,  nisi  ut  bonorum  omnium  fontem  esse  et  originem,  agnoscas;  unde  et  desiderium  illi  adhaerendi,  et  fiducia  in  ipsum  nasceretur,  si  non  sua  pravitate  mens  hominis  a  recta  investigatione  abduceretur.  Verum  in  utroque  apparet  mira  omnium  nostrum  vanitas  et  vecordia.  Ubi  enim  perpetuus  obedientiae  tenor  in  tota  vita  esse  debuerat,  in  cunctis  prope  operibus  securissime  illi  rebellantes,  pauculis  sacrificiis  placare  illum  studemus;  ubi  sanctimonia  vitae  et  cordis  innocentia  illi  serviendum  erat,  frivolas  nugas  comminiscimur  et  nihili  observatiunculas,  quibus  illum  demereamur.  Deinde,  ubi  in  illum  fiducia  nostra  defixa  esse  debuerat,  vel  in  nobis,  vel  in  creaturis  aliis  desidet.  Tandem  tot  erroribus  perversisque  opinionibus  implicamur,  ut  scintilla  illa,  quae  ad  contemplandam  Dei  maiestatem  nobis  praelucebat,  suffocetur  et  exstinguatur,  ne  ad  veram  usque  notitiam  nos  deducat.  Tamen  manet  semen  illud,  quod  revelli  a  radice  nullo  modo  potest:  aliquam  esse  divinitatem;  sed