9:282  NATURA  FALSI  DEI.  Falsus  Deus  est  tardus  ad  misericordiam,  propensus  ad  iram,  qui  maximam  mundi  partem  creavit  ad  perniciem,  eosque  non  solum  ad  damnationem,  sed  etiam  ad,  causam  damnationis  praedestinavit  Itaque  decrevit  ab  aeterno,  et  vult  efficitque  ut  peccent  necessario,  ita  id  nec  furta,  nec  adulteria,  nec  homicidia  [pag.  18]  committantur  nisi  eius  voluntate  atque  impulsu.  Suggerit  enim  eis  pravos  affectus  et  inhonestos,  non  solum  permissive,  sed  efficaciter,  eosque  indurat:  ita  ut  dum  impie  vivunt,  Dei  opus  potius  quam  suum  faciant,  neque  aliter  possunt.  Satanam  facit  esse  mendacem,  ita  ut  non  iam  Satan,  sed  Deus  Calvini  sit  pater  mendacii,  quippe  qui  saepe  aliud  in  ore,  aliud  in  pectore  gerat.  NATURA  DEI  VERI.  At  Deus  is  quem  ei  natura  et  ratio  et  sacrae  literae  docent,  est  illi  plane  contrarius.  Est  enim  ad  misericordiam  propensus,  ad  iram  tardus,  qui  hominem,  a  quo  omnes  homines  orti  sunt,  creavit  ad  imaginem  suam,  sui  similem,  ut  eum  in  paradiso  collocaret,  et  vita  beata  donaret.  Hic  Deus  vult  ut  omnes  homines  salvi  fiant,  neque  quisquam  pereat:  ideoque  misit  filium  suum  in  terras,  cuius  iustitia  superabundaret  ubicunque  abundavit  peccatum:  cuius  iustitiae  lux  illuminat  omnem  hominem  venientem  in  hunc  mundum,  clamatque:  Venite  ad  me  omnes  qui  laboratis  et  onerati  estis,  et  ego  reficiam  vos.  Hic  suggerit  bonos  affectus  et  honestos,  et  homines  a  peccandi  necessitate  (in  quam  ipsi  se  ipsos  sua  inobedientia  praecipitaverant)  liberat,  sanatque  omnem  languorem  morbumque  in  populo,  adeo  ut  nemini  unquam  petenti  beneficium  denegaverit  Atqui  hic  Deus  venit  ut  destrueret  illius  Calviniani  Dei  opera,  illumque  foras  eiiciat.  Atque  hi  duo  Dii,  ut  sunt  natura  inter  se  contrarii,  sic  gignunt  etiam  filios  inter  sese  contrarios:  videlicet  ille  immisericordes,  superbos,  immites,  invidos,  sanguinarios,  calumniatores,  fictos,  aliud  [pag.  19]  in  corde,  aliud  in  ore  gerentes,  impatientes,  malitiosos,  seditiosos,  contentiosos,  ambitiosos,  avaros,  voluptatis  magis  quam  Dei  amantes:  denique  omnibus  pravis  et  inhonestis  affectibus  plenos,  quos  eis  ipsorum  pater  suggerit.  At  alter  Deus  homines  gignit  misericordes,  modestos,  mites,  benevolos,  beneficos,  a  sanguine  abhorrentes,  apertos,  veritatem  ex  cordis  abundantia  dicentes,  patientes,  benignos,  pacatos,  pacificos,  a  iurgiis  et  litibus  abhorrentes,  honoris  contemptores,  liberales,  Dei  magis  quam  voluptatum  amantes,  denique  omnibus  honestis  affectibus  plenos,  quos  eis  ipsorum  pater  suggerit  Haec  sunt  Calvine,  quae  adversarii  tui  de  doc-